Улуттук университеттеги соңку жаңылыктар

2023-жылдын 25-январында башкы имараттагы санариптик технологиялар борборунда административдик жана чарба иштери боюнча проректор Бакытбек Айтахуновдун катышуусу менен КУУнун гранттык комиссиясынын отуруму болуп, абитуриенттерди кышкы кабыл алуунун 4-турунун жыйынтыгы чыгарылды. Кабыл алуу комиссиясынын жооптуу катчысы Изат Усенов интернет аркылуу абитуриенттерден келип түшкөн талондор тууралуу маалымат берип, багыттар боюнча өткөрүү баллын  сунуштаган соң, комиссия мүчөлөрү тарабынан тиешелүү чечимдер кабыл алынды. 

2023-жылдын 24-январь күнү Кыргыз улуттук университетинин имаратында (Чүй пр., 180А) улуу жазуучу Чыңгыз Айтматовдун 95 жылдыгына арналып, Кыргыз Республикасынын Билим берүү жана илим министрлиги, Улуттук илимдер академиясы жана Ж.Баласагын атындагы Кыргыз улуттук университети тарабынан уюштурулган “Чыңгыз Айтматов – кыргыз-казак элинин руханий байлыгы” аталышындагы VII эл аралык форум болуп өттү. Жыйынга Жогорку Кеңештин төрагасы Нурлан Шакиев, Мамлекеттик катчы Сүйүнбек Касмамбетов, Казакстан Республикасынын Парламентинин Сенатынын төрагасы Маулен Ашимбаев, Казакстан Республикасынын Маалымат жана коомдук өнүктүрүү министри Дархан Кыдырали, Кыргыз Республикасынын Билим берүү жана илим министри Уланбек Мамбетакунов катышты.

Сот адилеттиги, прокурордук жана укук коргоо ишмердүүлүк факультетинин (мурдагы КГЮА) ПД(б)3-21 тобунун студенти Эмиль Молдодосов 2023-жылдын 2-4-январь күндөрү Доха шаарында өткөн оор атлетика боюнча “Катар Кубогу” деп аталган ири эл аралык турнирге 89 килограммга чейинки салмак категориясында катышып, 1 алтын жана 2 күмүш медалга ээ болду. КУУнун студенти жулкууда 162 кг, ал эми түртүүдө 185 кг салмактагы штанганы көтөрүп, жыйынтыгында 347 кг. салмак менен экинчи орунду ээледи. Факультет жамааты студент Эмиль Молдодосовдун спорттогу жетишкендиктери менен сыймыктанат жана алдыда көптөгөн ийгиликтерди каалайт!

2023-жылдын 19-январь күнү башкы имараттагы чоң жыйындар залында QS рейтинг системасы жана Scopus/Web of Sсince платформалары боюнча семинар-тренинг өткөрүлдү. Жыйынды илимий иштер боюнча проректор Назаркул Ишекеев ачып, Өкмөттүн чечими боюнча Улуттук университет жакынкы 3 жылдын ичинде эл аралык деңгээлдеги авторитеттүү QS рейтинг системасы боюнча Орто Азия мейкиндигиндеги белгилүү жогорку окуу жайлардын катарына кириши керек экендигин белгиледи жана учурда аталган рейтингге кирген Кыргыз-Түрк Манас университетинин тажрыйбасы менен таанышууну сунуштап, ал окуу жайдан келген кызматкерлерди тааныштырды.

2023-жылдын 18-январында башкы имараттагы санариптик технологиялар борборунда окуу иштери боюнча проректор Эрлан Базарбаевдин катышуусу менен КУУнун гранттык комиссиясынын отуруму болуп, абитуриенттерди кышкы кабыл алуунун 3-турунун жыйынтыгы чыгарылды. Кабыл алуу комиссиясынын жооптуу катчысы Изат Усенов интернет аркылуу абитуриенттерден келип түшкөн талондор тууралуу маалымат берип, багыттар боюнча өткөрүү баллын  сунуштаган соң, комиссия мүчөлөрү тарабынан тиешелүү чечимдер кабыл алынды. Жыйындын соңунда Эрлан Базарбаев алгачкы жолу өткөрүлүп жаткан кышкы кабыл алуу кампаниясын үзгүлтүккө учуратпай, кадимкидей өткөрүп жаткандыгы үчүн кабыл алуу комиссиясынын жооптуу катчысы Изат Усеновго жана анын командасына жетекчиликтин атынан ыраазычылык билдирди.

Кыргыз тил илими кафедрасынын профессору Гүлжамал Жаманкулова 2022-жылдын 19-21-сентябрында Уфа шаарында болуп өткөн "Академическая гуманитарная наука в XX - начале XXI в.: достижения, тренды и перспективы развития" деген эл аралык илимий-практикалык конференцияга онлайн форматта катышып, "Новые направления лингвистики и ее развитие в Кыргызстане" аттуу доклад жасаган. Учурда аталган конференциянын материалдары Уфа шаарында (Башкортстан) жарык көрүп, жыйнакта Гүлжамал Жаманкулованын "Новые направления лингвистики и ее развитие в Кыргызстане" аттуу макаласы да жарыяланды.

2023-жылдын 11,12-январь күндөрү башкы имараттагы чоң жыйындар залында “Тилдерди Z муунга окутуунун технологиялары” аталышындагы семинар-тренинг өткөрүлдү. Бишкек шаарындагы жогорку окуу жайлардын окутуучулары үчүн Улуттук университеттин мамлекеттик тил сектору тарабынан уюштурулган иш-чараны мамлекеттик тил жана тарбия иштери боюнча проректор Садык Алахан ачып, катышуучуларга ректордун куттуктоосун айтты жана мамлекеттик тилде кесиптик билим берүү - баарыбыздын милдетибиз экендигин белгиледи. Анын айтымында, салтка айланып калган иш-чарага мурунку жылдары келген окутуучулардын 15-20 пайызынын катышып отурушу - семинар-тренингдин пайдалуу экендигинин белгиси. - Жандуу алакалашуу болсун үчүн каалаган суроолорду бериңиздер, - деп сөзүн жыйынтыктады Садык Алахан. 

2023-жылдын 11-январында башкы имараттагы санарип технологиялары борборунда окуу иштери боюнча проректор Эрлан Базарбаевдин катышуусу менен КУУнун гранттык комиссиясынын отуруму болуп, абитуриенттерди кышкы кабыл алуунун 2-туру жыйынтыкталды. Кабыл алуу комиссиясынын жооптуу катчысы Изат Усенов интернет аркылуу абитуриенттерден келип түшкөн талондор тууралуу маалымат берип, аталган багыттар боюнча өткөрүү баллын  сунуштаган соң, комиссия мүчөлөрү тарабынан тиешелүү чечимдер кабыл алынды.

Кыргызстан аялдар конгресси Алыкул Осмонов атындагы Улуттук китепкананын Ч.Айтматовдун атындагы залында жылды жыйынтыктоо кечесин өткөрдү. Иш-чарада кыргыз айымдардына "Лидер" жана "Эмгектеги каармандыгы үчүн" деген төш белгилер тапшырылды. Сыйлангандардын арасында Улуттук университеттин окутуучу айымдары да бар. Социалдык гуманитардык илимдер факультетинин жогорку мектептин педагогикасы кафедрасынын профессору, педагогика илимдеринин доктору Раимкулова Ажарбүбү Супуровна "2022 жылдын мыкты илимпоз айымы", ал эми физика-математика илимдеринин кандидаты, доцент Байгазиева Нуриса Адилетовна "2022 жылдын мыкты айымы" номинацияларында женүүчү болушту.

Урматтуу Улуттук университеттин окутуучу-профессорлору жана кызматкерлери! Сиздерди математика жана информатика факультетинин жалпы жамааты келе жаткан жаңы 2023-жыл менен чын жүрөктөн  куттуктайт! Жаңы жыл – эң сүйүктүү жана жаркын майрамдардын бири. Бул майрам баарыбызды жаңы үмүттөр, тилектер жана келечекке умтулууларыбыз менен бириктирип келген майрам. Урматтуу кесиптешетр! Сиздерди келе жаткан жаңы жыл майрамы менен кызуу куттуктап, бүткүл чыгармачылык кудуретиңиздерди келечек ээлерине терең билим, мыкты тарбия берүүгө жумшаган эмгектериңиздер үчүн аталган факультеттин студенттери өз ыраазычылыктарын билдиришет.

2022-жылдын 30-декабрында башкы имараттагы чоң жыйындар залында Окумуштуулар кеңешинин жаңы курамынын алгачкы отуруму болуп өттү. Аталган кеңештин төрагасы, Улуттук университеттин ректору Төлөбек Абдырахманов алып барган жыйында негизги маселе катары "2022-жылдагы КУУнун илимий иштеринин жыйынтыгы жөнүндө", "Биология факультетинин деканынын отчету", "География, экология жана туризм факультетинин деканынын отчету" каралды. Жыйындын жүрүшүндө Улуттук университеттин жаңы окумуштуу катчысы болуп юридика илимдеринин кандидаты, доцент Керимканова Жаңыл Жусуповна шайланды.

2022-жылдын 17-ноябрь күнү кыргыз филологиясы факультетинин студенттеринин «Көрөңгө» тобу Коомдук телерадиоберүү корпорациясы тарабынан  жогорку окуу жайлар арасында өткөргөн Манас таануу интеллектуалдык таймашында катышып, 1-орунду ээлеген. 11 жогорку окуу жайдын студенттери катышкан таймаш өтө курч, кызыктуу өткөн. Интеллектуалдык таймаштын жеңүүчүлөрүн сыйлоо аземи 29-декабрда болуп, жеңүүчүлөр уюлдук телефондор жана грамоталар менен сыйланышты. Кыргыз филологиясы факультетинин студенттерин ийгилиги менен куттуктайбыз!

Мамлекет башчысы Садыр Жапаровдун жарлыгы менен Кыргызстандын социалдык-экономикалык, интеллектуалдык жана маданий потенциалын өнүктүрүүгө кошкон олуттуу салымы, о.э. кесиптик ишмердүүлүгүндөгү жетишкен зор ийгиликтери үчүн журналистика факультетинин профессору Абдиламит Матисаковго "Кыргыз Республикасынын эл жазуучусу" ардак наамы, кесиптик колледждин директору Аскарбек Акматовго "Кыргыз Республикасынын билим берүүсүнө эмгек сиңирген кызматкер" ардак наамы ыйгарылып, телерадиожурналистика кафедрасынын ага окутуучусу Чынар Капарова "Даңк" медалы, кыргыз тил илими кафедрасынын профессору Кульжамал Джаманкулова менен физиканы окутуу  технологиялары жана  табият таануу кафедрасынын доценти Рапия Исаева "Кыргыз Республикасынын Ардак грамотасы" менен сыйланды. Урматтуу кесиптештер, алган сыйлыгыңыздар кут болсун! Элге ак кызмат өтөп, аман болуңуздар. Сиздердин алган сыйлыгыңыздар - Улуттук университеттин сыймыгы. Биз силер менен сыймыктанабыз!

2022-жылдын 28-декабрь күнү математика жана информатика факультетинин студенттери К.Тыныстанов көчөсү менен Пушкин көчөсүнүн кесилишинде жайгашкан ачык асман астындагы скульптура музейине барып келишти. Студенттер сессиянын жүрүп жатканына карабастан, экзамендерди ийгиликтүү тапшырып, жарым жылдык окуу жылын жыйынтыктоо менен бирге кышкы каникулга чыгар алдында кызыктуу саякатка чыгып, искусство чеберлери, алардын эмгектери, түрдүү айкелдер менен таанышып, жан дүйнөсүнө руханий азык алып, көңүлдүү кайтышты. Белгилей кетсек, Бишкек шаарындагы эмен сейил багы борбор калаабыздын эң кооз жеринде жайгашкан. Бир нече чакырымга жайылган жашыл бульвар келүүчүлөрдү тынч эс алууга тартып турат.

2022-жылдын 28-декабрында Кожомкул атындагы спорт сарайында "Пирамида" медиахолдингинин “Жылдын мыктылары - 2022” теле долбоорунун алкагында өткөрүлгөн тандоонун жыйынтыгы чыгарылып, жеңүүчүлөрдү сыйлоо аземи болуп өттү. Иш чара жыл мыктыларынын кызыл килемден өтүүсү менен башталып, андан кийин көрүүчүлөргө жык толгон залда Кыргызстандын эл чарбасынын бардык тармактарынан тандалган "Жыл мыктыларын" сыйлоо аземи болду. Эмгектеги жетишкендиги жана жогорку кесиптик чеберчилиги үчүн Жусуп Баласагын атындагы Кыргыз улуттук университеты «Жылдын мыкты университети» номинациясында жеңүүчү деп табылып, окуу иштери боюнча проректор Эрлан Базарбаевге тиешелүү диплом менен статуэтка тапшырылды.

2022-жылдын 28-декабрыь күнү башкы имараттагы санарип технологиялары борборунда окуу иштери боюнча проректор Эрлан Базарбаев жана административдик жана чарба иштери боюнча проректор Бакытбек Айтахуновдун катышуусу менен КУУнун гранттык комиссиясынын отуруму болуп, абитуриенттерди кышкы кабыл алуунун 1-туру жыйынтыкталды. Кабыл алуу комиссиясынын жооптуу катчысы Изат Усенов интернет аркылуу абитуриенттерден келип түшкөн талондор тууралуу маалымат берип, аталган багыттар боюнча өткөрүү баллын  сунуштаган соң, комиссия мүчөлөрү тарабынан тиешелүү чечимдер кабыл алынды.

2022-жылдын 27-декабрында социалдык-гуманитардык илимдер факультетинин жогорку мектептин педагогикасы кафедрасында аспирант Чынара Асаналиеванын "13.00.01 - Жалпы педагогика, педагогиканын жана билим берүүнүн тарыхы" багыты боюнча "Педагогикалык практиканын жүрүшүндө болочок мугалимдин кесиптик компетенттүүлүгүн калыптандыруу" аттуу темадагы кандидаттык диссертациясын талкуулоо болуп өттү (илимий жетекчиси - педагогика илимдеринин доктору, профессор Г.Т.Карабалаева). Факультет деканы, психология илимдеринин кандидаты, доцент Камчыбек уулу Мырзабек изденүүчүгө ийгиликтерди каалап, ийгиликтуу жактоосуна тилектештигин билдирди.

2022-жылдын 27-декабрында №5-окуу имаратындагы жыйындар залында кыргыз филологиясы факультетинин жаштар уюму тарабынан уюштурулган “Жаңы жыл – жаңы жашоо” аталышындагы майрамдык кече өткөрүлдү. Иш-чара факультет деканы Б.Жайлообаевдин, профессор Б.Байсабаевдин жана доцент Н.Турдубаеванын куттуктоо сөздөрү менен башталды. Факультет деканы 2021-2022-окуу жылында студенттерди тарбиялоодогу өзгөчө эмгектери үчүн бир катар профессор-окутуучуларга ыраазычылык кат, ал эми окуудагы жетишкендиктери жана коомдук иштерге активдүү катышкандыктары үчүн бир нече студенттерге грамоталарды тапшырды.

2022-жылдын 26-декабрында Кыргыз Республикасынын Жогорку Кеңешинин социалдык саясат боюнча комитетинин жыйыны болуп, анда каралган беш маселенин экөөсү мамлекеттик тил маселелерине арналды. Парламенттик угууларга Билим берүү жана илим министрлигинин, Маданият, маалымат, спорт жана жаштар саясаты министрлигинин, Мамлекеттик тил жана тил саясаты боюнча улуттук комиссиянын өкүлдөрү жана тиешелүү мамлекеттик кызматтардын өкүлдөрү катышып, коомдук ишмерлер, Президенттик Администрациянын өкүлдөрү, окумуштуулар жана журналисттер чакырылды. Кыргыз тил илими кафедрасынын профессору Гүлжамал Жаманкулова да аталган жыйынга атайын чакыруу менен катышты.

Математика жана информатика факультетинин жетекчилиги кыргыз тили жана адабияты дисциплинасынан сабак берген окутуучулар Чыманова Тажикан, Думанаева Мээрим жана Элтузерова Гүлзинаны мамлекеттик тилди өркүндөтүүгө олуттуу салым кошкондугу, кесиптик ишмердигиндеги чоң жетишкендиктери, о.э. залкар жазуучу Чыңгыз Айтматовду эскерүү жана "Улуттук адабият күнүнө" карата "Кыргыз тили" коомунун "Ыйык тил" төш белгисине ээ болушу менен чын жүрөктөн куттуктап, кесиптештерине чың ден соолук, мындан ары да албан-албан чыгармачылык ийгиликтерди каалайт.

2022-жылдын 9-декабрында Уфа илим жана технологиялар университетинин башкыр филологиясы, чыгыш таануу жана журналистика факультети менен Башкортстандагы регионалдык коомдук уюм Кыргыз маданиятынын "Ала-Тоо" борбору биргеликте офлайн жана онлайн форматта "Духовная культура башкир и кыргызов" деген темада эл аралык илимий-практикалык конференция өткөрүшкөн. Иш чарага Россия, Кыргызстан, Туркия, Казахстан жана Башкортстандан окумуштуулары катышкан. Учурда аталган конференциянын материалдары өзүнчө жыйнак болуп басмадан чыгып, КУУнун профессору Гүлжамал Жаманкулованын "Языковые параллели в письменности башкир и кыргызов" аттуу макаласы аталган жыйнакта (79-86-бб.) жарык көрдү.

Кыргыз филология факультетинин 1-3- курс студенттери Сабырбекова Нуркыз жана Султанжанова Фарида Казакстандын "Бөбек" эл аралык уюмунун алкагында жыл сайын өткөрүлүүчү сыйлоо аземине жана И.Арабаевдин 140 жылдыгына карата өткөрүлгөн конференцияга катышып "СНГнын 100 жаңы жүзү" сынагынын сыйлыктары менен сыйланышты. Алар бул убакытка чейинки жетишкендиктеринин негизинде диплом, медалдарга татыктуу болушту. Алардын жетекчилери Орозалиева Жүрсүн жана Бекназарова Буркия эжелерге дагы ыраазычылык баракчасы берилди. Иш чара И.Арабаев атындагы Кыргыз мамлекеттик университетинин илимий китепканасында өткөрүлүп,  ага бардык университеттердин өкүлдөрү жана Казакстандын Кыргызстандагы элчилигинин кызматкерлери катышты.

2022-жылдын 26-декабрында КУУнун ректору Төлөбек Абдырахманов 2021-2022-окуу жылынын жыйынтыгы боюнча Президенттик стипендияга татыктуу болгон Улуттук университеттин студенттери Султанов Актанды, Жолдошбек кызы Уулкелсинди жана Дудай Анастасияны кабыл алып, окуудагы мыкты жетишкендиктери жана окуу жайдын коомдук турмушуна активдүү катышкандыгы үчүн КУУнун Ардак грамотасы менен сыйлап, Улуттук университет алар менен сыймыктанаарын билдирди жана алдыңкы студенттерге чың ден соолук, жаңы жылдык жакшы маанай, окуудагы албан-албан ийгиликтерди каалады. Президенттик стипендиаттарды сыйлоо аземине илимий иштер боюнча проректор Назаркул Ишекеев жана мамлекеттик тил жана тарбия иштери боюнча проректор Садык Алахан катышты.

2022-жылдын 25-декабрь күнү №7-жатакананын жашоочусу Муратбек уулу Анвар Каба уулу Кожомкул атындагы спорт сарайында кыргыз күрөшү боюнча Кыргыз Республикасынын биринчи абсолюттук чемпиону Туратбек Мазиевдин 75 жылдык мааракесине карата өткөрүлгөн кыргыз күрөшү боюнча республикалык мелдеште 1-орунду ээлеп, 18 жашында "Кыргыз Республикасынын спорт чебери" (мастер спорта) наамына ээ болду. Ал эми Зияпова Айкөл 22-23-декабрь күндөрү Бишкек мэриясынын маданият, спорт, туризм жана жаштар иштери боюнча департаменти уюштурган алыш, белбоо күрөшүнүн эркин түрү боюнча Бишкек шаарынын чемпионатына катышып, 75 кг. салмакта 3-орунду алды.