Улуттук университеттеги соңку жаңылыктар

2022-жылдын 2-март күнү башкы имараттагы кичи жыйындар залында кесиптик колледждин котормо иши бөлүмүнүн окутуучусу Саадат Муратованын “Элдик салт - баба мурасы” аттуу китебинин бет ачар аземи болду. Жыйынды колледж директору Аскар Акматов ачып, китептин кыргыз, орус, англис жана корей тилдеринде жазылгандыгын баса белгиледи. Эмгектин автору Саадат Муратова китептин мазмунуна кенен токтолуп, элдик салт тууралуу кызыктуу кеп курду. Иш чара Манас айтуу, ыр аткаруу жана Мастура Бердибекова жетектеген “Кыргыз көчү” ансамблинин коштоосунда өттү. Аземге котормо иши  бөлүмүнүн башчысы Нурипа Куртубаева, профессор Салайдин Эралиев, о.э. кесиптик колледждин бөлүм башчылары; мугалимдери жана студенттери катышты. 

2022-жылдын 2-март күнү "Аялдар кеңеши" коомдук бирикмеси Аялдардын эл аралык майрамына карата «Кана эмесе, кыздар!» аттуу интеллектуалдык оюн уюштуруп, акыл таймашка Бишекек шаарындагы алты жогорку окуу жайдын командалары ат салышты. Улуттук университетинин атынан тарых жана чөлкөм таануу факультетинин "Аруузат" командасы катышып, экинчи орунду ээледи. Жеңүүчүлөр кубок, диплом жана сертификаттар менен сыйланышты. "Аруузат" командасынын мүчөлөрү: Аккошоева Айгерим (РК(б)-1-18), Айбек кызы Айтурган (РК(б)-1-18), Рыскул кызы Айгерим (И(б)-1-18), Сырдыбаева Сезим (РК(б)-2-20) жана Рыскул кызы Айгерим (И(б)-1-18).

2022-жылдын 2-мартында кесиптик колледжде 2 жаңы лингафондук кабинеттин ачылыш аземи болду. Иш чарага окуу иштери боюнча проректор Бекжан Темиров менен административдик-чарба иштери боюнча проректор Туратбек Суранаев катышты. Колледждин директору Аскар Акматов заманбап техника менен жабдылган жаңы кабинеттер чет тилдерин үйрөнүп жаткан студенттерге чоң жардам берээрин белгиледи. Андан кийин, Handi Craft компаниясынын адиси колледждин чет тил мугалимдери үчүн тренинг өткөрүп, мугалимдер жаңы жабдууларды сынап көрүштү. Белгилей кетсек, кабинеттердеги жабдыктар толугу менен кесиптик колледждин кызыктыруучу фондунун эсебинен алынды.

2022-жылдын 2-март күнү башкы имараттагы чоң жыйындар залында Кыргыэ Республикасынын Мамлекеттик туусунун кабыл алынгандыгынын 30 жылдыгына жана Ак калпак күнүнө арналган салтанаттуу жыйын болуп өттү. Иш чарага Жогорку Кеңештин депутаты Мирлан Самыйкожо, Кыргыз Республикасынын эмгек сиңирген артисти, манасчы Дөөлөт Сыдыков, Мамлекеттик туунун авторлорунун бири Сабыр Иптаровдун жубайы, Борбордук Азиядагы Америка университетинин окутуучусу Бурул Шамбаева катышты. Жыйын Сабыр Иптаров тууралуу видеоролик менен башталып, мамлекеттик тил жана тарбия иштери боюнча проректор Садык Алахандын сөзү менен уланды 

2022-жылдын 1-мартында мамлекеттик тилде окулган “Мыкты лекция”, “Мыкты практикалык сабак” сынагынын алкагында кыргыз-европа факультетинин доценти Анара Камалова 4-курс студенттерине “Эл аралык маркетингде товарды изилдөө” темасында лекция окуду. Сабакка мамлекеттик тил боюнча проректор Садык Алахан, мамлекеттик тил бөлүмүнүн башчысы Динара Мырзагулова, академиялык саясат башкармалыгынын окуу процессин координациялоо бөлүмүнүн адиси Фарида Төлөбаева жана мамлекеттик тил бөлүмүмнүн адиси Роза Жолдошева катышты.

2022-жылдын 1-март күнү социалдык-гуманитардык илимдер факультетинин жогорку мектептин педагогикасы кафедрасында кезектеги отурум болуп, жыйында ушул кафедранын бүтүрүүчүсү, докторанты, п.и.к., доцент Рахат Сулайманованын “Кыргызстанда педагогикалык кадрларды даярдоонун теориясы жана практикасы” аттуу темадагы педагогика илиминин докторлук даражасын изденип алуу учун жазылган диссертациялык иши талкууланды. Жыйынга факультет деканынын м.а. Камчыбек уулу Мырзабек төрагалык кылып, п.и.д., профессор Э.М.Мамбетакунов, п.и.д., профессор Н.О.Мааткеримов, п.и.д., профессор А.С.Раимкулова, п.и.д., профессор Г.Т.Карабалаева, п.и.к., доцент Т.С.Сатыбекова, п.и.к., доцент М.А.Сатыбекова, о.э. докторанттын илимий жетекчиси п.и.д., профессор Н.А .Асипова баш болгон кафедранын жалпы жамааты катышты.

2022-жылдын 1-мартында 6-окуу имараты тараптагы футбол талаасында «Ректордун кубогун» утуп алуу үчүн кичи футбол боюнча турнирдин ачылыш аземи болду. Иш чараны мамлекеттик тил жана тарбия иштери боюнча проректор Садык Алахан ачып, бул иш чара Президент Садыр Жапаровдун «Инсандын руханий-адеп-ахлактык өнүгүүсү жана дене тарбиясы жөнүндө»  2021-жылдын 29-январында кол койгон жарлыгын ишке ашыруу багытында өткөрүлүп жатканын айтып, оюнчуларга ынтымак, достук, ийгилик каалады жана калыстардын так мамиле кылаарына ишенээрин билдирди.

2022-жылдын 28-февралында математика жана информатика факультетинде "Ооганстан - айыкпаган жара" аттуу кече өткөрүлүп,  иш чарага Ооган согушунун ардагерлери Кадыр Уметов менен Адылбек Маматов катышты. Жыйынды факультет деканы Изат Усенов ачып, бул жолугушуу студенттердин патриоттук сезимин дагы бир жолу ойготоорун жана тынчтыкты сактоо - жашап жаткан коомдогу эң негизги баалуулук экенин белгиледи. Бишкек шаардык Ооган согушунун ардагерлер кеңешинин төрагасы Кадыр Уметов аталган органдын аткарган иштери, Ооган жеринде болгон окуялар, о.э. ардагерлердин 1999-жылдагы Баткен окуясында, 2005, 2010-жылдардагы революция учурунда жана Ош, Жалал-Абад окуяларында биринчилерден болуп элибиздин тынчтыгы үчүн тикеден-тик тургандыгы жөнүндө айтып берди.

Германиянын Франкфурт-на-Майне шаарында жыл сайын өткөрүлүүчү "Frankfurter Buchmesse" дүйнөлүк ири китеп көргөзмөгө Гүлжамал Жаманкулованын китептери катышып, “Байыркы кыргыз тили” аттуу китеби көргөзмөнүн алтын медалына татыктуу болду жана китептин аннотациясы көргөзмөнүн каталогуна жарыяланды. Аталган көргөзмө китептерди, илимди жайылтуу, автордук укуктарды колдонуу жана лицензияларды алуу боюнча дүйнөдөгү эң маанилүү платформа. 5 күндүн ичинде көргөзмөгө 100дөн ашык өлкөдөн 7 000 экспонент, 300 000 адам катышкан.

2022-жылдын 24-февралында кыргыз филологиясы факультетинин кыргыз тили жана адабияты кыргыз тилинде окутулбаган билим берүү мекемелеринде кафедрасынын доценти Эмил Акунов КТАОМ-1-19 группасы менен биргеликте “Манастын уулу Семетей” аттуу драмалык сахна-сабагын өткөрдү. Аталган сабак №5-окуу имаратынын Манас өргөсүндө болуп, группанын студенттери актёрдук чеберчилигин көрсөтүштү жана өздөрүнө бөлүнгөн ролдорду жогорку деңгээлде аткарганга аракет кылышты.

2022-жылдын 24-февраль күнү экономика факультетинин финансы кафедрасынын ага окутуучусу Ж.Шералиева мамлекеттик тилде даярдалган «Мыкты лекция», «Мыкты практикалык сабак» сынагынын алкагында “Мамлекеттин бюджеттик системасы” темасында ачык сабак өттү. Ачык сабакка мамлекеттик тил боюнча проректор Садык Алахан (Тиллебаев), факультет деканы Эркин Кулова, мамлекеттик тил бөлүмүнүн башчысы Динара Мырзагулова жана академиялык саясат башкармалыгынын окуу процессин координациялоо бөлүмүнүн адиси Төлөбаева Фарида катышты.

2022-жылдын 22-февралында педагогика факультетинин мектепке чейинки, мектеп педагогикасы жана билим берүү технологиялары кафедрасынын ага окутуучусу Асылгүл Жуматаева мамлекеттик тилде даярдалган «Мыкты лекция», «Мыкты практикалык сабак» сынагынын алкагында педагогика бвгытындагы 4-курс студенттерине «Башталгыч мектептерде окуу, жазуу жана предметтерди интеграцияланган жана дифференцияланган окутуу» дисциплинасынан «Текст предмет менен тилди интеграциялап окутууда кеп ишмердүүлүгүн өнүктүрүү үчүн негиз катары» темасында ачык практикалык сабак өттү.

Математика жана информатика факультетинин жалпы жамааты тарбия иштери боюнча декандын орун басары Бактияр Рахманкуловду Кыргыз Республикасынын Президентине караштуу Мамлекеттик тил боюнча улуттук комиссиясынын Төш белгисине ээ болушу менен чын жүрөктөн куттуктап, ага чыӊ ден соолук, мындан ары да албан-албан чыгармачыл ийгиликтерди каалайт. Бактияр Зулпукаровичтин бүгүнкү сыйлыгы талашсыз, анткени 1999-жылдан баштап азыркы күнгө чейин, т.а. 23 жыл бою декандын тарбия иштери боюнча орун басары кызматын үзгүлтүксүз түрдө аркалап, факультеттеги иш чаралардын баарын кыргыз тилинде жогорку денгээлде өткөрүп келет.

Билим берүү жана илим министрлигинин 2022-жылдын 20-январындагы 50/1 жана Дене тарбия жана спорт департаментинин 2022-жылдын 17-январындагы 4-Н буйруктарынын негизинде жогорку окуу жайлардын кызматкерлери арасында өткөрүлгөн «Ден соолук – 2022» спартакиадасында Улуттук университеттин намысын коргоого активдуу катышкандыгы жана спортко болгон сүйүү менен сергек жашоонун үлгүсүн мыкты көрсөтүп келгендиги үчүн КУУнун волейбол боюнча кыз-келиндер командасы ректордун ыраазычылыгына ээ болуп, грамота менен сыйланды. Алар бул жеңишин Ж.Баласагын атындагы Кыргыз улуттук университетинин 90 жылдыгына арнашты.

2022-жылдын 22-февраль күнү №7-жатаканада Ата-Мекенди коргоочулар күнүнө карата "Мыкты мырза" сынагы болуп, мелдешке ар бир кабаттан 2ден студент катышты. Алар "Дефиле", "Саламдашуу", "Үй тапшырмасы", "Суроо-жооп", "Пародия", "Күтүлбөгөн тапшырма", "Балдар ашканада" жана "Спорттук таймаш" деген тапшырмаларды аткарышты. Сынакты курамына жатаканалар боюнча менеджер Бексултан Шабданов (төрага), жатакана вахтерлору Гүлайым Осмонкулова, Эркингүл Кенешова, жатаканын маданият секторунун башчысы Орозбек Каримов жана комендант Жакшылык кызы Асель кирген калыстар тобу баалашты.

Мурда кабарлангандай, социалдык-гуманитардык илимдер факультетинин “Педагогика жана психология” багытынын 1-курс студенти Жусупова Салтанат Эне тилдин эл аралык күнүнө карата мамлекеттик тил бөлүмү тарабынан уюштурулган «Сабаттуу бол» жат жазуу сынагында англис тили боюнча 1-даражадагы диплом менен сыйланган. 2022-жылдын 22-февралында факультет деканы Камчыбек уулу Мырзабек сынактын уюштуруучуларына жана Жусупова Салтанатка жалпы факультеттин жамаатынын жана жеке өзүнүн атынан ыраазычылыгын билдирип, өткөрүлгөн иш чара жаштарды китеп окууга, сабаттуу жазууга үндөө максатын көздөй тургандыгын, о.э. жарандардын тилди билүү деңгээли канчалык жогору болсо, коомдун интеллектуалдык жана рухий маданияты ошончолук өсөөрүн белгилеп, Салтанатка ийгиликтерди каалады.

23-февраль — Мекенге кызмат кылуунун, аскердик эрдикти, муундардын ажырагыс байланышын жана аскердик духтун уландысын чагылдырган эң сонун  майрам. Бул майрамда туруктуулуктун жана баатырдыктын, аскердик жеңиштердин жана бийик адеп-ахлактык, патриоттук идеалдардын символу болуп, өз Мекенин душмандардын кол салууларынан коргогон бардык жоокерлердин элесине таазим этебиз жана урматтайбыз. Алардын арасында каргашалуу Баткен окуясында мамлекетибиздин эгемендүүлүгүн, коопсуздугун коргоп, курман болгон аскер кызматкерлери бар. Биз ар бир жылдардагы солдат жана матрос, сержант жана старшина, мичман жана прапорщик, офицер, генерал жана адмирал катары армияда, флотто жана авиацияда ийгиликтуу кызмат өтөп, Мекен алдындагы өз ыйык аскердик милдетин татыктуу аткарышкан мекендештерибиз менен сыймыктанабыз.

2022-жылдын 22-февраль күнү математика жана информатика факультети №6-окуу имаратындагы 115-дарсканасында Ата Мекенди коргоо күнүн белгилеп, иш-чарага куралдуу күчтөрдүн полковниги Айтбаев Жоошбай катышты. Ал Кыргызстандын Куралдуу күчтөрүнүн түзүлүшү, заманбап аскердик курал-жарактар менен куралдануусу, аскердик түзүмдөрү, эл аралык кызматташтыгы, окуу жайлары, ошондой эле офицерлерди даярдоо негизинен Россиянын, Казакстандын, Азербайжандын, Түркиянын жана Кытайдын аскер мектептердинде жүргүзүлөрүн айтып берди.

"Liber Madrid - 2021" китеп-көргөзмөсү Испаниянын билим берүү жана кесиптик даярдоо министрлигинин, маданият жана спорт министрлигинин, о.э. Мадрид шаардык кеңешинин расмий колдоосу менен өткөрүлгөн. Иш чаранын алкагында бизнес жолугушуулар, китеп презентациялары, тегерек столдор, лекциялар, талкуулар оффлайн режимде да, көргөзмөнүн бизнес-платформасын колдонуу менен онлайн режимде да болгон. Көргөзмөнүн стенддеринде коюлган материалдар менен китеп басып чыгаруунун, илим жана билим берүүнүн 10 000ден ашык адистери таанышкан. Көргөзмөнү дүйнөнүн бардык булуң-бурчунан 130дан ашык маалымат каражаттары чагылдырган.

КУУнун ректору Канат Садыковдун 2022-жылдын 21-февралында кол койгон №57-буйругуна ылайык 23-февраль - Мекенди коргоочулардын күнү Кыргыз Республикасынын Эмгек кодексинин 113-беренесинин негизинде Жусуп Баласагын атындагы Кыргыз улуттук университетинин кызматкерлери үчүн эс алуу күнү болуп жарыяланып, административдик-чарба иштери боюнча проректорго майрам күнүндө университеттин өрт коопсуздугун, мүлкүн жана материалдык баалуулуктарынын сакталышын камсыздоо үчүн атайын кызматтардын нөөмөт жүгүртмөсүн бекитүү тапшырылды.

2022-жылдын 21-февралында башкы имараттагы чоң жыйындар залында кыргыз филологиясы факультетинин студенттери тарабынан уюштурулган интеллектуалдык оюн жана Ата Мекенди коргоочулар күнүнө карата факультеттин кыздары тарабынан даярдалган чоң программадагы концерт өткөрүлдү. Алгач, факультеттин ар бир группасынан түзүлгөн командалар арасында кыргыз тили жана адабияты боюнча интеллектуалдык оюн болуп, андан соң факультеттин жалпы мырзаларын куттуктап, кыздар жамааты тарабынан уюшулган концерт тартууланды. Иш чара факультет деканы Б.Жайлообаев менен кыргыз тили жана адабияты кыргыз тилинде окутулбаган билим берүү мекелеринде кафедрасынын башчысы Э.Акуновдордун куттуктоо сөздөрү менен башталды. 

2022-жылдын 21-февраль күнү Эне тилдин эл аралык күнүнө карата мамлекеттик тил бөлүмү тарабынан уюштурулган «Сабаттуу бол» жат жазуу сынагыны жыйынтыгы чыгарылып, жеӊүүчүлөрдү сыйлоо аземи болуп өттү. Иш-чараны мамлекеттик тил жана тарбия иштери боюнча проректор Садык Алахан (Тиллебаев) куттуктоо сөзү менен ачып берген соң, КР Президентине караштуу Мамлекеттик тил жана тил саясаты боюнча улуттук комиссиянын жетектөөчү адиси Кутмырза Жакыбалиев математика жана информатика факультетинин деканынын орун басары Бахтияр Рахманкуловго аталган комиссиянын “Кыргыз тили” төш белгисин, ал эми факультеттер аралык мамлекеттик тил кафедрасынын ага окутуучусу Гүлзина Элтузеровага “Ардак грамотасын” тапшырды.

2022-жылдын 18-февралында кесиптик колледждин кыргыз-кытай бөлүмүнүнүн окутуучусу Айнабаева А.К. 2-курстар арасында “Котормонун кыргыз тилине тийгизген таасири” атту темада тегерек стол өткөрдү. Иш чара окутуучунун алгы сөзү менен башталып,  студенттердин көркөм окуу жана баяндоолору менен уланды. Баяндоолордо “Көркөм котормо”, “Кыргыз тилинин коомдогу статусун көтөрүү”, “Синхрондук котормо” жана башка темалар каралды. Жыйындын жүрүшүндө о.э. студенттер тарабынан орус тилинен кыргызчага которулган “Простоквашинодогу кыш” (ПДо-1-20 группасы), “Башкатырма” (ПДо-3-20) жана “Фиксики” (ПДо-2-20) аттуу мультфилимдер көрсөтүлдү.

2022-жылдын 18-февраль күнү кыргыз тилчи Гүлзина Элтузерова математика жана информатика факультетинин 1-курстары менен биргеликте 21-февраль – Эне тилдин эл аралык күнүнө карата майрамдык иш-чара өткөрдү. Студенттердин мекен алдындагы жоопкерчилигин арттыруу, атуулдук сезимдерин ойготуу, эне тилин сүйүүгө, сактоого умтулуу жана ар түрдүү шык-жөндөмдөрүн өстүрүү максатында уюштурулган жыйында белгиленип жаткан дата тууралуу маалымат берилди. Иш-чаранын чакырыгы: Келгиле студенттер, баарыбыз биргеликте дүйнөдө теңдеши жок алп “Манастай” дастандарды жараткан эне тилибизди сактоого өз салымыбызды кошолу!