2023-жылдын 12-сентябрында журналистика жана коммуникация институтунун профессордук-окутуучулук курамынын өкүлдөрү Кыргызстандын коммуникаторлор ассоциациясы тарабынан уюштурулган журналисттик билим берүү боюнча семинарга катышышты. Анда ЮНЕСКО жана Аль-Фараби атындагы КазМУ тарабынан ачык маалыматтык платформаларга жайгаштырылган, коомдук лицензия берилген онлайн окуу курстары боюнча маалымат алуу, үйрөнүү, талкуу жүрдү. Аталган иш-чарага КУУнун, БГУнун, Ала-Тоо  Эл аралык университетинин жана ОшМУнун өкүлдөрү катышты. Иш-чаранын жүрүшүндө коомдук лицензия  алган программалар  боюнча маалымат менен ЮНЕСКОнун Алматыдагы бюросунун өкүлү Сергей Карпов, Кыргызстандын коммуникаторлор ассоциациясынын башчысы Элира Турдубаева тааныштырды. 

ЖОЖ өкүлдөрү ЮНЕСКОнун программаларынын негизинде иштелип чыккан онлайн курстардын презентациясын сунуштап, талкуулашты.

Журналисттик билим берүү программасынын алкагында ЮНЕСКОнун Алматыдагы  бюросунун өкүлү Сергей Карпов журналистика жана коммуникация институтунун директору Ш.Костюк менен жолугушуп, алгачкы журналисттерди даярдаган, өлкөдөгү журналисттик илимди негиздеген Ж.Баласагын атындагы Кыргыз улуттук университетинде конокто болду. Жолугушууда  институттун материалдык-техникалык базасы менен тааныштыруу уюштурулуп, андан сырткары журналистика боюнча ЮНЕСКОнун окутуу программаларын колдонуу жана таркатуу, илимий-изилдөө иштерин уюштуруу жаатында сөз болду.

Улуттук университеттин журналистика жана коммуникация институту ЮНЕСКОнун долбоорлору менен иш алып барган, кызматташтык алака түзгөн алгачкы окуу жайы. 1995-жылы журналистика факультетинин радиостудиясы ЮНЕСКОнун  Борбордук Азияда телекоммуникацияны өнүктүрүү багытындагы атайын техникалык гранттын негизинде уюшулган. 

1997-жылы факультеттин телестудиясы ЮНЕСКОнун Борбордук Азиядагы телекоммуникацияны өнүктүрүү багытындагы колдоо долбоорунун алкагында уюштурулган. Бул студияда киносценарист Кадыркул Өмүркулов, белгилүү оператор Манасбек Мусаевдин авторлугунда  “Очаг благодатных знаний” документалдуу фильми, Олег Гречко башында турган студенттер тобунун “Дуэль” фильми тартылган. Бүгүнкү күндө ал “Баласагын ТВ” студиясы деп аталат.

П.Джаныбекова - адис