Ийне менен кудук казган кыргыз айымдары, кудаага шүгүр, азыр бир топ. Бирок, ошолордун арасында куттуу уябыз Улуттук университеттин гана эмес жалпы эле атпай журттун сыймыгына ээ болгон экономика илимдеринин доктору, профессор, Москванын атактуу окуу жайларынан билим алган кадырлуу эжейибиз Айсалкын Асановна Асанованын орду өзгөчө болчу. Айсалкын Асановна чоң илимпоз гана эмес талыкпас таалимчи, баркы бийик педагог да эле. Өмүр бою эмгек эткен Улуттук университетибизде адистиктердин өзүнчө бир салааларын негиздеген, тикелеген таалыкпас уюштуруучулугу айтып бүткүс аңыз болчу...

Айсалкын Асановнанын көптөгөн сыйлыктарынын эң акыркысы куттуу уябыздын "Жусуп Баласагын атындагы Кыргыз улуттук университетинин төш белгиси" (медалы, жетимиш беш миң сом акчалай сыйлыгы менен) болгону биз үчүн өзүнчө бир символикалуу окуя болгондой сезилет...

26-август күнү асылбаа эжейибиздин акка моюн сунгандыгынын кырк күндүгү зор өкүт, орду толгус кайгы менен белгиленет...

Айсалкын эже, жаткан жериңиз жайлуу, топурагыңыз торко болсун. Жараткан бейишинен жай берсин, ылайым...

Сиз ар качан биздин жүрөгүбүздөсүз, эже...

Садык Алахан - мамлекеттик тил жана коомдук иштер боюнча проректор