2023-жылдын 27-июнунда Кыргыз улуттук университетинде "Кыргыз-казак элдеринин тагдырлаш тарыхы жана алакалаш келечеги" аттуу эл аралык илимий конгресс өткөрүлдү. Жыйынга кыргызстандык жана казакстандык белгилүү тарыхчы, түрколог окумуштуулар катышты. Алардын арасында Казакстан Республикасынын Ч.Валиханов атындагы тарых жана этнология институтунун мүдүрү Зиябек Кабульдинов, Мамлекеттик тарых институтунун мүдүрү Буркитбай  Аяган ж.б. илимпоздор бар. Илимий конгрессте Кыргызстандык жана Казакстандык окумуштууларынын тыгыз кызматташтыгынын айрым жемиштери да сунушталды.

Иш-чараны Тарых жана чөлкөм таануу институтунун мүдүрү Туратбек Сырдыбаев ачып, Кыргыз Республикасынын Мамлекеттик катчысы Сүйүнбек Касмамбетовдун куттуктоо катын окуп берди. Жыйындын катышуучуларына куттуктоо сөздөрүн о.э. Жогорку Кеңештин депутаты Жанар Акаев, Кыргыз Республикасынын Президентине караштуу “Мурас” фондунун төрагасы Кыяс Молдокасымов жана Франциянын Борбор Азияны изилдөө институтутун мүдүрү Адриен Фову мырза айтышты.

Андан кийин конгресстин пленардык отуруму башталып, төмөндөгү баяндамалар окулду:

• Курманов Зайнидин Карпекович – К.Дикамбаев атындагы Дипломатиялык академиянын проректору, т.и.д., профессор: "Кыргызский филиал партии «Алаш»: деятельность и значение"
• Абдырахманов Төлөбек Абылович - Ж.Баласагын атындагы КУУнун ректору, КР УИА мүчө-корреспонденти, т.и.д. профессор: "Азыркы мезгилдеги Кыргызстандагы тарых илимиинин өнүгүшү"
• Кабульдинов Зиябек Ермуханович - Ч.Валиханов атындагы тарых жана этнология институтунун мүдүрү, КР УИА мүчө-корреспонденти, т.и.д., профессор: "Основные направления развития исторической науки Казахстана: опыт, проблемы, решения"
• Аяган Буркитбай Гелманович – Мамлекеттик тарых институтунун мүдүрү: "Тәуелсіз Қазақстандағы тарих ғылым бойынша мемлекеттік бағдаламалар: орындалуы мен тәжірибесі"
• Тлеубаев Шамек Баянович – Ч.Валиханов атындагы тарых жана этнология институтунун мүдүрүнүн илимий иштери боюнча орун басары, т.и.к.: "Жетісу өңіріндегі 1916 жылғы көтеріліс және «Ыстықкөл таза орыс уезін құру жобасы" жөнінде"
• Шашаев Ауезхан Кадыржанович – Ч.Валиханов атындагы тарых жана этнология институтунун улук эксперти, т.и.к.: «Талап» қоғамындағы қазақ және қырғыз зиялыларының қызметі".

Иш-чаранын жүрүшүндө о.э. "Казак-кыргыз тарыхый жылнамасы" китебинин бетачары болуп, Тарых жана чөлкөм таануу институтунун студентине Ч.Валиханов атындагы Тарых жана этнология институтунун 100 миң теңге өлчөмүндөгү стипендиясы тапшырылды. Ал эми Ч.Валиханов атындагы Тарых жана этнология институтунун мүдүрү, т.и.д., профессор Кабульдинов Зиябек Ермухановичке "Жусуп Баласагын атындагы Кыргыз улуттук университетинин ардактуу профессору" наамынын диплому жана мантиясы тапшырылып, башкы имараттагы 341-дарсканага Ч.Валихановдун ысымы ыйгарылды.