2023-жылдын 23-июнь күнү Башкы имараттагы чоң жыйындар залында Кореянын геоморфологиялык ассоциациясы менен Чонбук улуттук университети тарабынан уюштурулган “Туруктуу келечек үчүн Кыргызстандын тоолорун жана сууларын изилдөө боюнча кызматташуу” аттуу эл аралык конференция болуп өттү. Иш-чарага Кореядан келген окумуштуу, изилдөөчүлөр жана КУУнун геоэкология кафедасынын мугалимдери менен студенттери катышты. Жыйындын катышуучуларына КУУнун ректоруТөлөбек Абдырахманов кайрылуу жасап, бүгүнкү иш чарада илимий багыттагы маанилүү маселелер көтөрүлүп, Улуттук университеттин окумуштуулары үчүн жаӊы багыттар ачылаарын белгиледи жана Корея менен КУУнун окумуштуулары ортосунда байланыш түзүлүп, илимий-изилдөөчүлүк иштер мындан ары дагы тыгыз болооруна ишенээрин билдирди. 

Сөзүнүн соңунда ал кореялык окумуштууларга кайрылып, "Кыргызстан боюнча бир жума бою жүргүзүлө турган изилдөөлөрдүн жыйынтыгын жазып берсеңиздер, биз аны кыргыз тилине которуп, илимий багытта колдонобуз", - деген өтүнүчүн айтты.

Конференциянын пленардык отурумунда кореялык жана кыргыз окумуштуулары Кыргызстандын жаратылышы боюнча англис тилинде көптөгөн баяндамаларды жасашты.