Бул жолку өзгөрүүлөр башкы имараттын чыгыш жана батыш тарабындагы клумбалардын, о.э. алардын каршысындагы кашаа менен тосулган бакчанын ичине орнотулган эстеликтерди камтыды. Ал эстеликтерди ары-бери өткөндө баарыбыз эле көрүп жүрчүбүз, бирок, качан, кимге коюлганын, кантип аталаарын жана авторлору ким экенин сырттан келген меймандар эле эмес, университетте иштеген кызматкерлердин да басымдуу көпчүлүгү билбейт болчу. Ушул жагдайды эске алып, Төлөбек Абдырахманов КУУга ректор болуп келгенден кийин эле, 2022-жылдын октябрь айынын башында, университеттин басма сөз кызматына эстеликтердин баарын сүрөткө тартып, окуу жайдын художниги Болот Чегебаевге берүүгө, ал кишиге болсо сүрөттөрдүн жардамы менен эстеликтердин аталышын, авторлорун ж.б.у.с. маалыматтарды тактоо боюнча  тапшырма берген. 

Изилдөө иштери Т.Садыков атындагы Улуттук көркөм академиясында, ар кандай архивдерде өткөн жылдын ноябрь айынан үстүбүздөгү жылдын апрель айларына чейин уланып, жыйынтыгында бул эстеликтер 1998-жылдын сентябрь-октябрь айларында улуу жазуучу Ч.Айтматовдун 70 жылдык мааракесине карата өткөрүлгөн “Ч.Айтматовдун чыгармалары сүрөт искусствосунда" деген скульпторлордун XI республикалык симпозиумуна катышкан айкелчиледин эмгектери экени, о.э. ар бир эстеликтин автору, аталышы жана жасалган материалы аныкталды.

Андан кийин, ректордун тапшырмасы менен кыргыз филологиясы факультетинин деканы Бакыт Жайлообаев менен анын орун басары Актилек Солтоноев ар бир эстелик тууралуу кыргыз тилинде маалымат даярдашты. Керектүү  материалдар топтолгон соң, басма сөз кызматынын башчысы Жээнбек Эралиев университеттин сайтында атайын рубрика ачып, ал жакка эстеликтер тууралуу маалыматтарды жайгаштырды жана ар бир эстеликке QR-код киргизди. 

2023-жылдын 5-8-июнь күндөрү Университеттин буйрутмасы менен жогоруда айтылган маалыматтар жазылган 36 табличка даярдалып, эстеликтердин алдына орнотулду. Табличкада эстеликтин автору, аталышы, жасалган жылы, материалы, QR-коду жазылган. QR-код аркылуу жогоруда айтылгандардан сырткары, эстелик Ч.Айматовдун кайсы чыгармасынын каарманы экендиги жана ал чыгарма тууралуу маалымат алууга болот. Ал үчүн телефондогу фотоаппаратты иштетип, QR-кодго жакындатсаңыз, сайттагы маалыматка шилтеме чыгат. Аны басып, эстелик тууралуу толук маалымат алууга болот. Айтмакчы, телефондун QR-кодду окуй алаарын текшерүү үчүн ушул тексттен кийин берилген сүрөттөрдү колдонууга болот.