2023-жылдын 8-июнунда 3-окуу имаратынын 3-кабатында Фундаменталдык илимдер институтунун «Жасалма интеллект» илимий-изилдөө борбору ачылды. Борбордун алдына тартылган кызыл лентаны Билим берүү жана илим министрлигинин илим бөлүмүнүн башчысы Жылдызбек Жакшылыков менен КУУнун ректору Төлөбек Абдырахманов кесишти. Андан кийин, аземдин катышуучулары илимий изилдөө борборунун "Прикладдык изилдөөлөр жана робототехника", "Жасалма интеллект жана Big Data", "R&D (Изилдөө жана өндүрүү)" деп аталган лабораториялары менен таанышып чыгышты. Борбордун структурасы, алдына коюлган милдеттер жана аткарылып жаткан иштер тууралуу Фундаменталдык илимдер институтунун директору Амантур Рыспаев айтып берди. 

Анын айтымында, илимий-изилдөө борбору илимий иш-чараларды уюштуруу, гранттык конкурстар, эксперттик жана аналитикалык иштер жаатында КУУнун кызматкерлеринин жана илимий топторунун ишмердүүлүгүн консолидациялоо жана өнүктүрүү максатында түзүлгөн. Борбордун кызматкерлери о.э. университеттин билим берүү түзүмдөрүнүн академиялык жана өндүрүш багытында республикалык жана чет өлкөлүк өнөктөштөр менен жасалма интеллект жана маалыматтык технологогиялар боюнча тыгыз кызматташуусун уюштуруу жана кеңейтүү, приоритеттүү багыттардагы илимий, технологиялык долбоорлорду иштеп чыгуу жана аларды ишке ашыруу иштерин жүргүзөт. Андан сырткары, алар бакалавриат менен магистратуранын «Жасалма интеллект» багытындагы программаларын өнүктүрүү, адистер менен окутуучулардын квалификациясын жогорулатуу боюнча илимий-практикалык семинарларды, конференцияларды, курстарды уюштурат. 

"Прикладдык изилдөөлөр жана робототехника" лабораториясында студенттер менен магистранттар жетекчилерге өздөрү жасаган дрон тууралуу айтып, бөлмөнүн ичинде учуруп да беришти. R&D лабораториясында илимий изилдөөлөр жүргүзүлүп, жыйынтыгында продукциянын үлгүлөрү иштеп чыгылат, б.а. алынган жаңы билимдер жаңы продукцияларды түзүүдө колдонулат. 

«Жасалма интеллект» илимий-изилдөө борборунун ачылуу аземине арналган жыйында КУУнун ректору Төлөбек Абдырахманов, Билим берүү жана илим министрлигинин илим бөлүмүнүн башчысы Жылдызбек Жакшылыков, илимий иштер боюнча проректор Назаркул Ишекеев, Борбор-Азиялык жерди прикладдык изилдөө институтунун директору Болот Молдобеков, «Dolon Systems» компаниясынын вице-президенти Руслан Ибрагимов, «Ulut Soft» компаниясынын башкы директору Мирбек Окенов, долбоордун жетекчиси Баратбек Сабитов чыгып сүйлөштү.

Төлөбек Абдырахманов Улуттук университетке жаңы кызматка келип атканда, окуу процесси боюнча кыжаалат болбогонун, анткени бул багытта иштей тургандар Кыргызстанда толтура экенин, бирок "силердикиндей ишке келгенде" тынчсызданганын, "бул багытта иштей турган киши табылат болду бекен" деп кыжаалат болгонун айтып, бирок Улуттук университеттин уучу кур эмес, жакшы балдар, жакшы кыздар - өгөчө жаштар бар экенин айтып, алардан 3-4 команда түзүлгөнүн белгиледи. - Идеяга аябай берилген, духтары күчтүү балдар экен. Иштеп көрүшсүн, булардын колунан жакшы нерселер келет деп ишенем. "Сууну сиңген жерге куй" демекчи, ректорат колунан келишинче колдойт. Силер өсүп чыксаңар, башкалар да аракет кылат, "жасаса болот турбайбы" деп. Анын үстүнө министрлик да, өкмөт да бул багыт боюнча талапты күчтүү коюп атат. Ишиңерге ийгилик, - деди Төлөбек Абдырахманов.

- Улуттук университет Кыргызстандагы жогорку окуу жайлардын арасынын суурулуп чыгып, өзүн көргөзүп, эл сыймыктанган университет боло алат деп ишенем. Анткени, Улуттук университет - көрөңгөсү бар, башка университеттердин баары чыккан университет. Илимий, педагогикалык потенциал бар. Болгону, силкинип, бир аз иштеш керек. "Жасалма интеллект" боюнча ноябрь айында белгиленүүчү Илим күнүнө карата кичинекей болсо да "кармап көрө турган" нерсени көрсөтүп, айтып бергиле. Баарыңарга эмгек, тырышчаактык, аракет каалайм, - деди Билим берүү жана илим министрлигинин илим бөлүмүнүн башчысы Жылдызбек Жакшылыков.  

Белгилей кетсек, "Жасалма интеллект жана Big Data" лабораториясын техникалык жактан камсыздоого Ulut Soft компаниясынын башкы директору Мирбек Окенов зор салым кошту. Ал эбегейсиз чоң көлөмдөгү маалыматтарды удаалаш эмес, параллель иштетүүчү Ryzen 75800 процессорунун негизинде жасалган GPU-server алып, орнотуп берди.