2023-жылдын 3-июнь күнү башкы имараттагы чоң жыйындар залында «Философия», «Саясат таануу» жана «Мамлекеттик кызмат» адистиктерин окуп аяктаган бүтүрүүчүлөрдүн жолугушуусу болуп өттү. Иш-чарага ал кездеги мамлекеттик башкаруу жана социалдык изилдөөлөр институтуна 1998-жылы тапшырып, 2003-жылы аяктаган 60тан ашык бүтүрүүчүлөр, аларга сабак берген окутуучулар жана коноктор катышты.  Жыйынды модератор Айтбаев Азамат ачып, өткөрүлүп жаткан жолугушуунун кыскача максаты жөнүндө маалымат берип өттү. Андан соң кезек куттуктоо сөздөргө берилип, алгач КУУнун ректору Төлөбек Абдырахманов чыгып сүйлөдү. 

Ал жолугушуунун катышуучуларын куттуктап, мындай жолугушуулар университетте көп өткөрүлүп тураарын, бирок бүгүнкү иш-чара алардан өзгөчө жана биринчи жолу болуп жаткандыгын белгиледи. - Ар бир бүтүрүүчү өзүнүн бүткөн окуу жайын сыймыктануу менен айта жүрүшү керек. Урматтуу биздин университеттин бүтүрүүчүлөрү, мен сиздерге чың ден-соолук, узак өмүр каалайм, мындан аркы дагы чон-чон ийгиликтерди аркалап жүрүшүңөргө тилектешмин!

Ошол кездеги Мамлекеттик башкаруу жана социалдык изилдөөлөр институтунун директору болуп иштеген Аалыбек Акунов да бүтүрүүчүлөрдү майрамы менен куттуктап, иштерине ийгиликтерди каалап, институттун кыскача тарыхынан маалымат берип өттү. Профессор Издевалды Искаков бүтүрүүчүлөрдүн студенттик кезинен сөз кылып, уюштурулуп жаткан иш-чаранын маанилүүлүгүн белгилеп, ыраазычылыгын билдирди жана иштерине ийгиликтерди каалап өттү.

Азыркы Социалдык-гуманитардык илимдер институтунун директору Камчыбек уулу Мырзабек институттун тарыхын, азыркы учурдагы абалын, келечеги жөнүндө толук маалымат берип, биз даярдаган кесиптердин ээлери коомдун бардык тармактарына керек экендигин, бардык тармактарга иштөөгө мүмкүнчүлүктөрү чоң экендигин баса белгиледи жана залда отурган катышуучулардын баардыгына ийгиликтерди каалады.

Андан соң, модератор Азамат Айтбаев программа боюнча эркин микрофон узатып, келген коноктордун ичинен алгач окутуучулар: Венера Ибраева, Кенже Тостокова, Таалайбек Иманкожоев уюштуруучуларга ыраазычылыктарын билдиришип, жакшы иш-чара өткөрүлүп жаткандыгын баса белгилешти. Куттук сөздөрүн айтышып, бүтүрүүчүлөрдүн студенттик учурларынан кызыктуу көз ирмемдерди эскерип өтүштү.

Мугалимдерге, жалпы университеттин жамаатына жана бүгүнкү жетекчиликке ыраазычылыктарын билдиришип, бүгүнкү жолугуунун максаты жөнүндө айтышып, бүтүрүүчүлөрдүн атынан: Эрмек Мукашов, Таалай Осмонов, Элиза Шамшидинова, Тахир Шинды ж.б. сүйлөштү.

Уюштуруучулар устаттарына ыраазычылык билдиришип, белектерин тапшырышып, университетке бүтүрүүчүлөрдүн фондун ачуу планын талкуулап, кабыл алышты. Ошондой эле, иш-чаранын бирден бир максаты болгон «Бүтүрүүчүлөрдүн аллеясы» аталган участокко барып, бак тигүү аземине катышышты. Андан кийин университеттин окуу корпусунда уюшулган фотозонага барып, эстеликке сүрөткө түшүштү жана этнофуршеттен даам татышты.

Иш-чаранын соңунда бүтүрүүчүлөргө эркин убакыт берилип, окуу корпустарга экскурсия уюштурулду.

Жыйынды аталган институттун «Саясат таануу», «Философия» «Мамлекеттик кызмат» адистиктерин окуп аяктаган бүтүрүүчүлөрү уюштурушту.

А.Т.Качкынова - Социалдык-гуманитардык илимдер институтунун директорунун окуу иштери боюнча орун басары, доцент