Тарых жана чөлкөм таануу институтунун “Тарых жана музеология” багытындагы 1-курс студенттери 15-майдан 3-июнга чейин археология, этнология, булактаануу жана тарыхнаама кафедрасынын башчысы Темирлан Чаргыновдун жетекчилиги жана кафедранын жооптуу окутуучуларынын катышуусу менен Ысык-Көлдө археологиялык жана этнографиялык практикадан өтүп келишти. Практиканын лагери Бостери айылындагы университеттин пансионатында жайгаштырылып, теориялык билимдерди практика жүзүндө текшерүүгө шарт түзүлдү. Кафедарынын тажырыйбалуу археологдору студенттерди ачык асман алдында жайгашкан петроглифтер менен тааныштырып, алар менен биргеликте чалгындоо иштерин жүргүзүп, археологиялык казуу иштеринин ыкмаларын үйрөтүп, андан соң казуу иштерин жүргүзүштү.

Институттун этнографтары студенттерге Ысык-Көлдө жашаган жергиликтүү элдердин каада-салты боюнча түшүндүрмөлөрдү берип, калк арасында сурамжылоолор жүргүзүлдү. Жыйынтыгында, абдан кызыктуу маалыматтар чогултулду.

Студенттер бош убактысында спорттук иш-чараларды, конкурстарды, салттуу оюн-зоокторду уюштурушуп, ардак грамоталар тапшырылды. Шаңдуу маанайда кызыктуу өткөн практиканын жыйынтыгында, алдыга коюлган максаттардын баардыгы ишке ашып, студенттер праткиканы толугу менен өздөштүрүштү.

* * *

Ал эми аталган багыттын 2-курс студенттери 2023-жылдын 22-майынан 2-июнуна чейин археология, этнология, булактаануу жана тарыхнаама кафедрасынын профессордук окутуучулук курамынын жетекчилигинде Кыргыз улуттук тарых музейинде жана М.В.Фрунзенин мемориалдык үй-музейинде практикадан өтүшүп, көптөгөн иш чараларды уюштурууга катышышты. Мисалы, "Маалымат доорундагы тарыхый институттар, китеп жана окуу" аттуу III Эл аралык конференцияда Кыргызстан, Казакстан, Өзбекстан, Түркмөнстан, Азербайжан, Россия, Армения жана Белоруссиянын илимий-маданий мекемелердин жетекчилеринин, окумуштууларынын илимий докладдарын угуп, теориялык билимдерин практика менен айкалыштырышты.

Музеология багытындагы студенттер музейдин сактоо фонду, каттоо фонду менен, о.э. экскурсияны туура жүргүзүү боюнча ар тараптуу лекциялар менен таанышышты. Аларга консервациялоо жана реставрациялоо боюнча лекция өтүлүп, карапа идиштерин калыбына келтирүү ыкмалары көрсөтүлүп, студенттер өз алдынча реставрациялоо иштерин жүргүзүштүү.

Жыйынтыгында, алдыга коюлган максаттардын бардыгы ишке ашып, студенттер практиканы толугу менен өздөштүрүштү, теориялык билимдерин практика жүзүндө ишке ашырышты.

Айдар Шейшенов - Азия жана Африка өлкөлөрүнүң тарыхы кафедрасынын лаборанты