2023-жылдын 2-июнь күнү башкы имараттагы кичи жыйындар залында журналистика жана коммуникация институтунун 1993-жылкы бүтүрүүчүлөрүнүн жолугушуусу болду. Жыйынга мындан 30 жыл мурун ал кездеги филология факультетинин журналистика бөлүмүн аяктаган 20дай бүтүрүүчүлөр катышты. Алар ЖКИнин азыркы абалы менен таанышкан соң, мындан 30 жыл мурдагы студенттерине профессор Абдыганы Халилов дагы бир жолу "символикалуу сабак" өттү. Жыйындар залындагы иш-чара көзү өтүп кеткен курсташтарды эскерүү менен башталып, студенттик күндөр тууралуу видеоролик көрсөтүлдү.

Андан кийин, Билим берүү жана илим министри Каныбек Иманалиев баштаган курсташтар студенттик кездеги ой-максаттары, азыркы аткарып жаткан иштери тууралуу айтып, залда отурган институттун окутуучуларына жана студенттерине ийгиликтерди каалашты. Куттук сөздөрүн о.э. Кыргызстандан тышкары жакта жашап, эмгектенип жүргөн бүтүрүүчүлөр да онлайн-режимде айтышты.

Иш-чаранын соңунда КУУнун ректору Төлөбек Абдырахманов чыгып сүйлөп, Улуттук университеттин бүтүрүүчүлөрү анын байлыгы, атак-даңкы экенин, журналистика студенттерде жакшы каситтерди, анын ичинде адамгерчилик менен чынчылдыкты тарбиялаарын белгиледи. - Журналисттер  - биздин жашоонун күзгүсү. Ошондуктан, мен Улуттук университет тууралуу эмне айтылып, эмне жазылып жатканына дайыма көңүл бурам. Урматтуу биздин университеттин бүтүрүүчүлөрү, мен сиздерге чың ден-соолук, узак өмүр каалайм. Арадан 5 жыл, 10 жыл өтсө да ушул бойдон кала бериңиздер. Улуттук университеттин эшиги сиздер үчүн дайым ачык, биз сиздерди күтөбүз, - деп сөзүн жыйынтыктады Төлөбек Абдырахманов.