Журналистика жана коммуникация институтунун профессордук-окутуучулук курамынын мүчөлөрү КР Коргоо министрлигинин буйрутмасы жана Билим берүү жана илим министрлигинин “Борбордук Азия чөлкөмүндөгү мамлекеттердин ортосундагы аскердик-саясый мамилелердин заманбап көз караштарын жана көйгөйлөрүн изилдөө жана мүмкүн болгон чек арадагы куралдуу кагылышууларды жөнгө салуу» долбоорунун алкагында  мамлекеттик жана муниципалдык башкаруу факультети тарабынан ѳткѳрүлгөн “Кыргыз Республикасында чек арадагы куралдуу кагылышуулар: көйгөйлөрү жана аны чечүү жолдору” аттуу кереге кеңешке катышты. Иш-чарага инвестициялар боюнча проректор Гүлбара Сыдыкова, илимий чөйрөнүн өкүлдөрү, журналистика жана коммуникация институтунун, мамлекеттик жана муниципалдык башкаруу факультетинин профессордук-окутуучулук курамы, магистранттар жана студенттер катышты.

Кереге кеңеште КР Географиялык коомунун президенти, г.и.д. С.К.Аламанов “Формирование государственной границы и государственной территории” деген темада баяндама жасап, чек арадагы демаркация жана делимитация маселелерине токтолду. Андан тышкары, тегерек столдун жүрүшүндө УИАнын Мамлекет жана укук институтунун саясат таануу бөлүмүнүн башчысы, саяс.и.доктору Т.Б.Мамытов, КР Куралдуу күчтөрүнүн аскердик институтунун профессору Т.К.Мадымаров, КР Коргоо министрлигинин аскердик билим берүү жана илим башкармалыгынын башкы адиси Б.К.Жунусалиев, КР Маданият, маалымат, спорт жана жаштар саясаты министрлигинин коомдук бирикмелер менен иштөө бөлүмүнүн башкы адиси Б.Ж.Раимбеков чек арадагы негизги көйлөр, аны чечүү жолдору, эл аралык дипломатия, маалымат согушу, Кыргызстандын саясаты, чектеш, кошуна өлкөлөрдүн чек ара маселесиндеги позициясы, өсүп келе жаткан муунду өз эли-жерин сүйүүгө тарбиялоо, билим деңгээлин көтөрүү өңдүү бир катар көйгөйлүү маселелерди айтышты. Атайын баяндама менен долбоордун аткаруучу мүчөсү, мамлекетик жана муниципалдык башкаруу факультетинин доценти, саяс.и.к. Г.А.Нурматова жана факультеттин 3-курсунун студенттери – Баткен областынын тургундары А. Мурзакул кызы менен А.Файзуллаева чыгышты. Иш-чара суроо-жооп, талкуулоо менен коштолуп турду.

Тегерек столдун жыйынтыгында илимий-практикалык жактан кызматташтык боюнча резолюция кабыл алынды.

П.Джаныбекова - адис