2023-жылдын 19-май күнү башкы имараттагы кичи жыйындар залында “Мамлекеттик тилди жана адабиятты ЖОЖдо окутуу: азыркы абалы, тажрыйбалар, ойлор, көйгөйлөр” аттуу педагогикалык чеберчиликти жогорулатуу боюнча илимий-практикалык жана окуу-методикалык семинар болуп өттү. Иш-чараны факультеттер аралык мамлекеттик тил кафедрасынын башчысы Гүлмира Осмоналиева ачып, семинардын максаты жана күтүлүп жаткан натыйжалар тууралуу билдирүү жасап, сөз кезегин КУУнун ректору Төлөбек Абдырахмановго берди. Ал Улуттук университет өзгөчө статус алгандыгына байланыштуу алдыда чоң өзгөрүүлөр болоорун, ошондуктан бардык нерсеге даяр болуш керек экендигин айтып, "Бүгүнкү отурумда темага коюлган көйгөйлөрдү чечиш үчүн, жагдайларды жакшыртыш үчүн стандарттуу эмес сунуштар айтылып, жакшы жыйынтык болот деген ойдомун", - деди.

КУУнун мамлекеттик тил жана социалдык иштер боюнча проректору Садык Алахан, Билим берүү жана илим министрлигинин мамлекеттик тилди өнүктүрүү секторунун башчысы Г.У.Ибраимова, КР Президентине караштуу Мамлекеттик тил  жана тил саясаты боюнча улуттук  комиссиясынын башкы адиси Зинат Кадырова, Кыргызтест мамлекеттик мекемесинин жетекчиси Б.Б.Ставинская-Топоева куттуктоо сөздөрүн сүйлөштү.  

Андан кийин, баяндамаларга кезек берилди.

• В.И.Мусаева - И.Арабаев атындагы КМУнун профессору: “Кыргыз тилинин предметтик стандарты же кыргыз тилин компетенттүүлүккө багыттап окутуу тууралуу”;
• Жумагул кызы Айнура - И.Раззаков атындагы КТУнун кыргыз тили кафедрасынын башчысы: “Техникалык жогорку окуу жайында кыргыз тилин окутуунун келечеги”;
• Ш.Б.Баратова - КУУнун компьютердик технологиялар жана жасалма интеллект институтунун директору: “Билим берүү системасындагы санариптештирүүнүн орду жана ролу”;
• Г.С.Дүйшеева - “Тилсlаb” кыргыз тилин  окутуу борборунун жетекчиси: “Деңгээлдик система менен окутуунун өзгөчөлүктөрү”;
• Ч.Д.Тюменбаева - КУУнун факультеттер аралык мамлекеттик тил кафедрасынын ага окутуучусу: “Интеллект картаны кантип түзөбүз?”;
• Э.Төлөкова - Кыргыз-Түрк “Манас” университетинин тилдер кафедрасынын ага окутуучусу: “Жогорку окуу жайларында, кесиптик билим берүүчү орто окуу жайларында кесиптик багытта адистик боюнча кыргыз тилинде билим берүүгө байланыштуу маселелер”.

Иш-чара суроо-жооп форматында абдан кызыктуу өтүп, соңунда катышуучуларга сертификаттар тапшырылды.

Кадыржан Жусупкелдиев – факультеттер аралык мамлекеттик тил кафедрасынын ага окутуучусу