2023-жылдын 11-майында башкы окуу имаратындагы кичи жыйындар залында журналистика жана коммуникация институту тарабынан уюштурулган “Мен репортёр” видеороликтер сынагынын жыйынтыгы чыгарылды. Жыл сайын өткөрүлүүчү салтка айланган сынак быйыл USAIDдин “Кургак учукту айыктыруу” долборунун жана “Кыргыз Жаш күч” коомдук уюмунун өнөктөштүгү менен уюштурулду. Салтанаттуу иш-чараны журналистика жана коммуникация институтунун директору Ширин Костюк ачып, сынактын маанилүүлүгүнө жана актуалдуулугуна токтолуп, кургак учук илдетинин көрсөткүчү жогору болгон өлкөнүн экономикалык, социалдык абалы төмөн дегенди түшүндүрөөрүн, ошондуктан дартты айыктыруу мүмкүн экендигин, калкка, элге туура маалымат жеткирүүдө болочок журналисттердин орду чоң экендигин баса белгиледи.

Иш-чарага окуу иштери боюнча проректор Эрлан Базарбаев, Улуттук фтизиатрия борборунун өкүлү Нестан Кубанычбекова, USAIDдин “Кургак учукту айыктыруу” долбоорунун координатору Чолпон Ибраимова, “Кыргыз Жаш күч” коомдук бирикмесинин негиздөөчүсү Улукбек Өмүрбеков, Б.Бейшеналиева атындагы Кыргыз мамлекеттик маданият жана искусство университетинин, Ош мамлекеттик университетинин, И.Ахунбаев атындагы Кыргыз мамлекеттик медицина академиясынын профессордук-окутуучулук курамы менен студенттери, ММК өкүлдөрү катышты. Келген коноктор куттуктоо сөздөрүндө уюштуруучуларга жана катышуучуларга ийгилик каалашып, мындан ары кызматташууну бекемдөө, күчтөндүрүү боюнча пикирлери менен бөлүшүштү.

Салтанаттуу иш-чаранын жүрүшүндө сынактын жеңүүчүлөрүнө белектер жана дипломдор тапшырылды. Андан тышкары, жаштар арасында кургак учук тууралуу маалыматты жайылтуу боюнча “Bilge Club” жаштар кыймылынын волонтёр-студенттери (КУУ, КММА, ОшМУ) тажрыйбасы менен бөлүшүштү.

П.Джаныбекова - адис