2023-жылдын 10-май күнү математика жана информатика факультетинин А.А.Бөрүбаев атындагы алгебра, геометрия, топология жана жогорку математиканы окутуу кафедрасында илимий-методикалык семинар болуп өттү. Жыйындын башында кафедра башчысы, профессор Бекболот Канетов бүгүнкү иш-чарада ф.-м.и.д., профессор А.А.Чекеевдин илимий изилдөө эмгектерине байланыштуу макалалар каралып, изилдөөнүн натыйжалары жана алардын жаңылыгы, практикалык маанилүүлүгү тууралуу Асылбек Чекеевдин илимий окуучусу, доцент Бактияр Рахманкулов баяндама жасаарын  билдирди.

Ф.-м.и.к., доцент Бактияр Рахманкулов "β- сымал компактификациясынын жаңы мүнөздөмөлөрү" деген докладында бардык чектелген COZ-функциялар алкагынын жардамы менен β-сымал компактификациясынын жалпы жана жаңы мүнөздөмөлөрүнүн тургузулушу профессор Чекеев Асылбек Асакеевич менен биргеликте бир калыптуу мейкиндикте аталган компактификацияны мүнөздөөчү теоремаларды далилдегендиги тууралуу сөз кылды.

Ал о.э. өз учурунда советтик математик Н.А.Шанин тарабынан Стоун-Чехтин βх компактификациясынын аналогу каралып, (Х,τ) -топологиялык мейкиндик үчүн CuX уникалдуу компактификациясы тургузулса, (Х,U)-бир калыптуу топологиялык мейкиндикте профессор А.А.Чекеев βuX компактификациясын тургузуп, илимий изилдөө иштерин жүргүзгөндүгү тууралуу баса белгилеп кетти.

Суроо-жооптордун негизинде өткөн кызыктуу талкуудан кийин Бактияр Рахманкулов өзүнүн илимий жетекчисин эскерип, 23 жыл бою агайдан таалим-тарбия алгандыгын, экөө баштап бүтпөй калган илимий эмгектерди улантып, иштеп жаткандыгын билдирип, кыргыз илиминин татыктуу өкүлү Асылбек Асакеевич Чекеев менен дайыма сыймыктанып келээрин билдирди.

Семинардын соңунда, жыйындын катышуучулары Бактияр Рахманкуловдун жасаган баяндамасы  боюнча оң пикирлерин айтышып, илимий жетекчисинин эмгектерин андан ары улантып жаткандыгын кубатташып, мындан аркы илимий иштерине албан-албан ийгиликтерди каалашты. 

"Жакшынын өмүрү кыска, даңкы узун" демекчи, агайыбыздын мезгилсиз дүйнөдөн кайтыш болгонуна жыл айланып отурат.

Белгилеп кетчү нерсе - математиканын хабилитацияланган доктору, физика-математика илимдеринин доктору, профессор, УИАнын корреспондент-мүчөсү Чекеев Асылбек Асакеевич 1999-2022-жылдары математика жана информатика факультетинин деканы, КУУнун илимий иштери боюнча проректору, Түрк дүйнөсүнүн математиктеринин математикалык коомунун вице-президенти, КР Президентине караштуу Улуттук аттестациялык комиссиясынын президиумунун мүчөсү, физика жана математика боюнча эксперттик комиссиясынын төрагасы, Web of Science маалымат базасы тарабынан индекстелген „TWMS Journal of Pure and Applied Mathematics", Россиянын RSCI маалымат базасы тарабынан индекстелген Жусуп Баласагын атындагы Кыргыз улуттук университетинин жарчысы, Кыргыз Республикасынын Президентине караштуу Улуттук аттестациялык комиссиянын "Кыргыз Республикасындагы илимий изилдөөлөр” электрондук журналы жана башка илимий журналдардын редколлегиясынын мүчөсү болуп эмгектенген. Анын жетекчилиги астында физика-математика илимдеринин кандидаты даражасын алуу үчүн 7 диссертациялык иш жакталган жана 170 тен ашык илимий иштердин автору.

Махабат Абрдаимова – АГТж/аЖМО кафедрасынын доценти, ф.-м.и.к.