2023-жылдын 4-май күнү санариптик технологиялар борборунда Журналистика жана коммуникация институту менен Улуттук телерадиоберүү корпорациясы биргелешип уюштурган “Радио – жаңы технологиялар шартында” аттуу кереге кеңеш болуп өттү. Иш-чараны КУУнун ректору Төлөбек Абдырахманов ачып, радио балачагынан бери маалымат алуунун негизги булагы болуп келгенин, жаңы технологиялардын өнүккөн доорунда да радио өзүнүн ордун, баркын, баасын, актуалдуулугун жоготпогонун баса белгиледи. Ректор о.э. журналистика факультети жаңы структура болуп түзүлүп, анын алдында чоң максаттар, чоң миссия турганын айтып өттү. Ошону менен бирге институт өлкөнүн ички рыногуна, массалык маалымат каражаттарына, анын ичинде радиодо кызмат кылчу адистерди даярдоодо чоң жоопкерчиликти жүктөп келаткандыгына токтолду.

Иш-чарага УТРКнын Кыргыз радиосунун, Биринчи радиосунун жана Миң-Кыял ФМдин, “Кабар” агенттигинин, региондордон келген агенттиктердин, Кыргызстандагы журналистика факультети же кафедрасы бар жогорку окуу жайлардын өкүлдөрү катышты. Жолугушууда теоретиктер менен практиктердин ойлору айтылып, радионун абалы, коомдо ээлеген орду, коомдук аң-сезимди калыптандыруудагы ролу, жаңы радиожурналисттерди даярдоодогу окуу ыкмаларынын маселеси каралды. Бүгүнкү жаңы технологиялар шартында радиожурналист кандай көндүмдөрдү билиши керек сыяктуу бир катар актуалдуу маселелер талкууланды.

Жыйындын жүрүшүндө УТРКнын директорунун орун басары У.Сатиев бүгүнкү күндө Кыргыз радиосунун, Биринчи радионун, Миң-Кыял ФМ радиосунун, Келечек балдар редакциясынын контентин өлкөнүн баардык аймактарына жеткирүү үчүн Улуттук корпорациянын жетекчилиги тиешелүү аракеттерди көрүп жаткандыгын, өзгөчө өлкөнүн түштүк аймагындагы айыл жерлерине радио жеткенин жана жаңы технологиялар шартында радиону тиркеме аркылуу угууга мүмкүнчүлүк түзүүгө аракеттер көрүлүп жатканын баса белгиледи. Аны менен катар мамлекеттин кызыкчылыгын, мамлекеттин саясатын жүргүзүүдө радионун ролу чоң экенин айтып өттү.

УТРКнын программалоо жана пландоо бөлүмүнүн башчысы Б.Сутенова, КРнын Эл артисти, Кыргыз-Түрк “Манас” университетинин профессору М.Мамбетакунов өз сөздөрүндө бүгүнкү радиожурналистиканын контентинде оюн-зоок, көңүл ачуучу программалар болушу керектигине, аны менен катар радионун агартуучулук миссиясын дагы унутпоо зарыл экенин баса белгилешти.

Кереге кеңеште “Кыргыз жолу” коомунун төрагасы К.Кошалиев, “Кут билим” медиаборборунун директору К.Чекиров дагы сөз сүйлөп, Кыргызстандагы радионун абалы, орду тууралуу пикирлерин билдиришти. Анын ичинде адеп-ахлак, тил, маданият, тарых, үрп-адат, каада-салт, улуттун философиясы, улуттун уңгусу өңдүү маселелер көтөрүлүп, техниканын өнүккөн доорунда радиодо даярдалган контентти ар бир угарманга жеткирүү чоң жоопкерчиликти талап кылары айтылып, кызыктуу талкуу жаралды.

Миң-Кыял радиосунун продюсери Т.Кожобеков өз сөзүндө музыкалык контент, бул жөн эле музыка эместигине, саясатты, улуттук идеологияны да музыка менен берсе болоруна токтолуп, аны менен катар Миң-Кыял ФМдин заман талабына жараша фейсбук, телеграм, инстаграм өңдүү социалдык тармактарда ишмердүүлүгүн жүргүзүп жатканын айтып кетти.

Биринчи радионун продюсери Б.Тукеев Биринчи радио маалыматтык берүүлөрдү элге жеткирип келе жаткан 90 жылдык тарыхы бар радио экенин баса белгилеп, аны менен бирге 7-май - Радио жана байланыш кызматкерлеринин кесиптик майрамын утурлай мыкты деңгээлдеги иш-чара уюштуруп бергендиги үчүн Ж.Баласагын атындагы КУУнун жетекчилигине терең ыраазычылыгын билдирди.

Келген коноктор Улуттук университетте радионун контентин, тарыхын изилдеген, ошондой эле радионун келечеги тууралуу илимий изилдөөлөр, илимий диссертациялар, илимий иштер жазылып, радиого көмөкчү болуп берсе деген пикирлерин айтышты.

П.Джаныбекова - адис

.