2023-жылдын 17-апрель күнү социалдык-гуманитардык илимдер факультетинин философия кафедрасынын PhD докторанты, доцент Таалайбек Иманкожоев математика жана информатика факультетинин студенттерине “Манас” эпосунда камтылган философиялык ойлор” деген темада 2 сааттык дарс окуп берди. Лекция жандуу өтүлүп, зор кызыгууну жаратты. Таалайбек Асановичтин айтымында, “Манас” эпосу - кыргыз элинин кылымдарды карыткан тарыхый, маданий казынасы. Бул чыгарма элибиздин басып өткөн тарыхый жолунун орчундуу окуяларын чогултуп, укумдан-тукумга өтүп келген улуу мурасы, улуттук сыймыгы. Лектор о.э. “Манас” эпосу кыргыз тарыхын, философиясын, жалпы эле руханий жана социалдык турмушунун ар кыл жактарын изилдеп үйрөнүүдөгү өзгөчө бай жана баалуу булак экендигин баса белгилеп кетти.

Иш-чаранын жүрүшүндө чогулуштун катышуучуларынын арасында “Манас” эпосу - кыргыз элинин улуттук байлыгы, элдик оозеки чыгармаларынын баалуу көрөңгөсү, дүйнөлүк элдик поэзиянын шедеври экендигин, манасчы Саякбай Каралаевдин вариантындагы бул эпос дүйнө жүзүндөгү чоң поэма болуп эсептелгендигине токтолуп, бул эпикалык чыгармада билим, таалим-тарбия берүү маселелеринин чагылдырылышы боюнча суроо-жооптордун негизинде  кызыктуу дискуссияга айланды. 

Жыйындын соңунда, антикалык доордун байыркы грек философу Фалестин, байыркы кытай “Инь-Ян” философиясынын китептериндеги биз жашап жаткан дүйнөнүн жаралышы тууралуу айтылып келген түшүнүктөрүн Таалайбек Иманкожоев өз лекциясында “Манас” эпосундагы 4 сап ыр менен салыштыруу иретинде бүтүндөй аудиторияга жеткиликтүү түшүнүк бергендиги үчүн, иш-чаранын катышуучулары ыраазычылыктарын билдиришти.

Бүгүнкү өтүлгөн иш-чаранын максаты - "Манас" эпосундагы философиялык ойлор менен бирге Кыргыз Республикасынын Конституциясынын 30 жылдыгы, анын кабыл алынышында ата-бабабыздын наркын, салтын сактап, Айкөл Манастын осуяттарына таянып, биримдикте, тынчтыкта жана ынтымакта табият менен таттуу мамиледе жашоону улантып, мамлекеттүүлүктү сактоо жана чыңдоо үчүн майтарылбас эркти көрсөтүп, социалдык адилеттикке, экономикалык бакубатчылыкка, билимге, илимге жана руханий өнүгүүгө умтулуп, азыркы жана келечек муундардын алдында Мекен үчүн жоопкерчиликти түшүнүү зарылдыгын жеткирүү ишинде дал ушул "Манас" эпосу баалуу булак, негизги көрөңгө, таяныч болгондугун студенттерге чечмелеп түшүндүрүү  максаты көздөлдү.

Агайыбыздын мындан аркы педагогикалык жана илимпоздук ишмердүүлүгүнө албан-албан ийгиликтерди каалайбыз.

Бактияр Рахманкулов - тарбия иштери боюча декандын орун басары, ф.м.и.к., доцент