2023-жылдын 12-апрель күнү башкы имараттагы чоң жыйындар залында социалдык-гуманитардык илимдер институтунун социология жана социалдык иштер кафедрасы тарабынан "Демография, үй-бүлө жана иденттүүлүк маселелери социалдык-гуманитардык илимдердин айдыңында" аталышындагы жогорку окуу жайлар аралык студенттердин республикалык II Социологиялык симпозиуму өткөрүлдү. Студенттердин жана магистранттардын илимге болгон кызыгуусун  арттыруу максатында уюштурулган иш-чарага Кыргыз улуттук университетинин, Бишкек мамлекеттик университетинин жана Кыргыз-Турк "Манас "университетинин студенттери катышты. 

Жыйында КУУнун ректору Төлөбек Абдырахманов чыгып сүйлөп, өткөрүлүп жаткан симпозиум демография, үй-бүлө жана иденттүүлүк маселелери боюнча талаш-тартыш болуп, идеялар, сунуштар айтылчу жакшы аянтча, формат жана мүмкүнчүлүк экенин белгилеп, социология, политология жана философия илимдеринин өнүгүүсүндө акыркы жылдары бир аз өксүктөр байкалганын билдирди.

- Социалдык-гуманитардык илимдер факультети институт статусун алгандан кийин аталган илимдерди кайрадан жандандырып, кайрадан өнүктүрүп, Улуттук университет ушул жааттагы илимдердин борбору болсун деген ойдомун. Менин оюмча, бүгүн ошонун башталышы. Баарыңарды жандуу, кызыкдар, анан креативдүү талкууларга, докладдарга жана сунуштарга чакырам, - деди Төлөбек Абдырахманов.

Андан кийин симпозиумдун секциялык отурумдары башталып, 1-секцияда "Демография жана уй бүлө", 2-секцияда "Иденттүүлүк жана үй-бүлө” деген темалардын алкагында Ж.Баласагын атындагы КУУнун, К.Карасаев атындагы БМУнун жана Кыргыз-Турк "Манас "университетинин студенттери төмөндөгүдөй кызыктуу баяндамаларды жасашты: 

• Кыязова Фатима - Ж.Баласагын атындагы Кыргыз улуттук университети: "Студенттик үй-бүлө жана анын көйгөйлөрү"
• Султанова Айгерим - К.Карасаев атындагы Бишкек гуманитардык университети: "Современные практики репрезентации отцовства"
• Мираида Досбай кызы: Кыргыз-Турк "Манас "университети: "Азыркы кыргыз үй-бүлөсүндөгү дасторкон маданияты"
• Кылымбүбү Дастанбекова - Кыргыз-Турк "Манас " университети: "Коомдо социалдык катмар катары кайырчылар"
• Турсунбекова Рузана - Ж.Баласагын атындагы Кыргыз улуттук университети: "Кыргыз элинин маданиятынын, тилинин жана каада салтынын азыркы коомдогу мааниси"
• Джумадилов Атай - К.Карасаев атындагы Бишкек гуманитардык университети: "Ценностные ориентации молодежи Кыргызстана".
• жана башкалар.

Секциялык отурумдар аяктап, симпозиумдун катышуучулары кайрадан чоң жыйындар залына чогулуп, иш-чаранын жыйынтыгын чыгарышкан соң, социалдык-гуманитардык илимдер институтунун жетекчиси Камчыбек уулу Мырзабек актуалдуу маслелерди чагылдырган кызыктуу макалалар “КУУнун жарчысы” журналына жарыяланаарын билдирип, мыкты баяндама жасаган студенттерге сертификаттарды тапшырды.

Материал уюштуруу тобу тараткан программанын негизинде даярдалды.