2023-жылдын 12-апрелинде физика жана электроника факультетинде Кыргыз Республикасынын билим берүүсүнө эмгек сиңирген кызматкер, КУУнун ардактуу профессору, быйыл 90 жылдыгы белгиленип жаткан Маамет Койчумановду жана КУУнун доценти, педагогика илимдеринин кандидаты, Кыргыз Республикасынын билим берүүсүнүн мыктысы Майлыбашева Чолпонду эскерүү кечеси болуп өттү. Иш чарага КУУнун ректору Төлөбек Абдырахманов, Улуттук аттестациялык комиссиянын төрайымы Бакыт Тыналиева, физиканы окутуу технологиялары жана табият таануу кафедрасынын башчысы, УИАнын корр.-мүчөсү, п.и.д., профессор Эсенбек Мамбетакунов жана башка коноктор катышты.

Жыйында сөз сүйлөгөн КУУнун ректору Төлөбек Абдырахманов уюштуруучуларга, келген меймандарга жана Маамет агайдын үй-бүлөсү менен жек-жаатына чоң ыраазычылык билдирип, залкар эже-агайларды унутуп калбай, убак-убагы менен, шарты менен эскерип, алардын эмгегине баа берип коюш абдан жакшы нерсе экендигин белгиледи.

Андан ары ал "Менин оюмча, физика жана электроника факультетинде чоң өзгөрүүлөр болот. Улуттук илимдер академиясынын институтуттары менен интеграция болуу маселеси коюлганын билесиздер. Анын алкагында УИАнын президенти, институттардын жетекчилери менен сүйлөшүүлөрдү жүргүздүм. Баары макулдугун билдирип атат. Мен ойлойм, бул интеграция физика жана электроника факультетине, математика жана информатика факультетине, химия жана химиялык технология факультетине абдан чоң өзгөрүүлөрдү алып келет. Бул алакалаштык эки жакка тең пайдалуу болот деп ойлойм. Ушуну эсиңерге алып, даярдана беришиңер керек. Жакында келишимге кол коёбуз. Анда көп нерселерди караштырабыз, көп нерселер чечилет", - деп сөзүн улантты.

90 жылдыгы белгиленип аткан Маамет агай тууралуу "Мен студент кезде агайдын сыртынан карап, тамшанып, ушул агайдай болуп мугалим болуп, университеттин короолорунда ары-бери басып, окуу имараттарына кирип, ушул университетке тиешелүү болуп калсам деп тамшанып калчумун. Маамет агай, чынын айтканда, Улуттук университетти "улуттук" кылган, ушул деңгээлге жеткирген залкарлардын плеядасынан. Ал биздин университетке ат көтөргүс кызмат кылды. Жаңы багыттарды көздөгөн, жаңы бийиктиктерди беттеген адам болчу. Көп жакшы нерселерди жасап кетти. Чоң ыраазычылык билдирем агайга", - деди ректор.

- Маамет агайдын жаркын элесин Улуттук университеттин жамаатынын, өзгөчө студент, магистранттардын, алдында мындан дагы зоболотуп, мындан дагы бийиктете турган бир маселе жакында болчу Окумуштуулар кеңешинде каралат. Буйруса ишке ашат деп ойлойм, - деп сөзүн жыйынтыктады Төлөбек Абдырахманов.

Маамет Койчуманов менен Майлыбашева Чолпон тууралуу эскерүүлөрү менен математика жана информатика факультетинин деканы Изат Усенов; физиканы окутуу технологиялары жана табият таануу кафедрасынын башчысы Эсенбек Мамбетакунов; Улуттук аттестациялык комиссиянын төрайымы Бакыт Тыналиева; профессор Абдылдаев М.Ю.; И.Раззаков атындагы КМТУнун физика кафедрасынын башчысы Султаналиева P.M.; профессор Орозбеков М.О.; И.Раззаков атындагы КМТУнун проректору Төрөбеков Б.Т.; профессор Каратаев М.М.; коомдук ишмерлер Маликова Ж. жана Бекбоев З.И., о.э. И.Раззаков атындагы КМТУнун кафедра башчысы Жапаров М.Т. бөлүшкөн соң, эскерилип жаткан инсандар тууралуу видео көрсөтүлдү.

Андан кийин, физика жана электроника факультетинин алдыңкы студенттерине жылына бир жолу берилүүчү Маамет Койчуманов атындагы стипендия тапшырылды.

Кеченин соңунда "Атам өлсө өлсүн, атамды көргөн өлбөсүн" демекчи, Маамет Койчуманов менен 40 жылдан ашуун бир кафедрада чогуу эмгектенген агайдын үзөнгүлөшү Эсенбек Мамбетакуновго Маамет Койчумановичтин балдары тебетей кийгизип, чепкен жабышты.