2023-жылдын 11-апрелинде башкы имараттагы санариптик технологиялар борборунда “Ааламдашуу жана технологиялык чакырыктар алкагындагы жождордун билим берүү көйгөйлөрү” аттуу тегерек стол болуп өттү. Социалдык-гуманитардык илимдер институтунун жогорку мектептин педагогикасы кафедрасы тарабынан уюштурулган иш-чараны аталган кафедранын башчысы Нурбүбү Асипова ачып, тегерек столдун максаты жана күн тартиби тууралуу билдирүү жасаган соң, сөз кезегин КУУнун ректору Төлөбек Абдырахмановго берди. Ректор иш-чаранын уюштуруучу тобуна, анын чакыруусун кабыл алып, убакыт таап, ой-сунуштарын айтуу үчүн келген күн тартибиндеги маселенин күңгөй-тескейинин баарын билген адис эже-агайларга ыраазычылык билдирди жана тегерек столдун темасы абдан маанилүү экендигин белгиледи. 

Андан ары ал Президенттини жарлыгы менен өзгөчө макам берилген Кыргызстандагы 5 университеттин жетекчилери тарабынан аткарылып жаткан иштер тууралуу кыскача маалымат берип, "эгер биз сунуштаган өзгөрүүлөр, документтер кабыл алынып калса, беш университетке чын эле жол ачылат", - деди. - Айтор, көп иштер аткарылды, бирок алдыда дагы көп иштер турат.

Иш-чара өткөрүп жаткан түзүм тууралуу токтолуп, Төлөбек Абдырахманов "Социалдык-гуманитардык илимдер факультети 1-апрелден баштап институт макамын алды. Макам берүү менен бирге биз булардын алдына чоң милдеттерди коюп, тапшырмаларды берип, "ордуңарды тапкыла" деп айтып атабыз. Институт социология, политология, философия багыттары боюнча аракет кылып жатат. Ошонун ичинде жогорку мектептин педагогикасы да бар", - деди.

- Мен ойлойм, бүгүнкү тегерек столго педагогика илимине кайдыгер эмес инсандар, окумуштуулар келип отурат. Жакшы сунушуңарды айтасыңар деген ойдомун. Бир эле киши отуруп алып акылдуу боло бербей, кызыкдар адамдар чогуу отуруп алып сүйлөшкөнү жакшы. Ишиңерге ийгилик каалайм, - деп сөзүн жыйынтыктады Төлөбек Абдырахманов.

Ректордун сөзүнөн кийин иш-чаранын пленардык отуруму башталып, төмөндөгү баяндамалар жасалды:

• Асипова Н.А. - п.и.д., профессор: "Көп баскычтуу жогорку билим, анын абалы жана келечеги";

• Мамбетакунов Э.М. - п.и.д., УИАнын корр.-мүчөсү, профессор: "Учурдагы жогорку педагогикалык билим берүү маселелери";

• Сатыбекова М. А. - п.и.к., доцент: "Жогорку билим берүүнүн профилдешүү маселелери";

• Карабалаева Г.Т. - п.и.д., доцент: "Дуалдуу педагогикалык билим маселелери: перспективасы жана ишке ашыруу жолдору";

• Раимкулова А.С. - п.и.д., профессор: "Технологиялык чакырыктар жана алардын билим берүү сапатына таасири".

Суроолор жана жарыш сөздөрдүн жүрүшүндө жогорку мектептин педагогикасы, жогорку окуу жайларында көп баскычтуу билимди ишке ашыруу боюнча актуалдуу маселелер талкууланган соң, тегерек столдун баяндамачылары менен катышуучуларына сертификаттар тапшырылды.

Материал уюштуруу тобу тараткан программанын негизинде даярдалды.