2023-жылдын 10-апрель күнү КУУнун ректору Төлөбек Абдырахманов окуу жайдын курамдык түзүмдөрүнүн учурдагы билим, илим, уюштуруучулук жана эл аралык байланыштар боюнча ишмердүүлүгүн баалоо жана алардын «Жогорку кесиптик билим берүү уюмдарынын потенциалын жана атаандаштыкка жөндөмдүүлүгүн жогорулатуу боюнча чаралар жөнүндө» Кыргыз Республикасынын Президентинин жарлыгын ишке ашырууга  мүмкүнчүлүктөрү менен аткаруу багыттарын аныктоо максатында программалык талдоо жүргүзүү боюнча түзүлгөн комиссиянын мүчөлөрү менен жолугушуп, аталган комиссиянын максаты жана иштөө багыттары тууралуу айтып берди.

- 20 күндүн ичинде бул ишке жакшы маани берип, жакшы көңүл буруп, ак ниеттүүлүк менен жакшы иштеп берсеңер, университет үчүн. Бул - текшерүү эмес, бул - мониторинг, - деп баштады ректор өз сөзүн. - Эң негизги максат – "Кайсы факультетте, кайсы кафедрада, кайсы лабораторияда эмне бар, эмне жок? Наукометрический данныйлар каякта төмөн, каякта жогору? Академиялык мобилдүүлүк менен илимий коллаборация кандай?" деген суроолорго сөз түрүндө эмес, документ түрүндө жооп алуу. Баарын шашпай, кылдат карап берсеңер. Үстүрт болбогула. Жок жерди бар деп жазып келсеңер, силерден кийин мен маселе көтөрөм. Бул иш-чара бүткөндөн кийин - майдын аягы, отпускага кеткенге чейин - жыйынтыгын чыгарабыз: кайсы жерде факультет болуш керек, кайсы жерде кафедра болуш керек, кайсы жерде лаборатория болуш керек же болбош керек. Силердин отчет ошого жумушчу материал болуп берет. Мунун жыйынтыгы менен, мүмкүн, мурда түзүлгөн факультет, институттарга толуктоолор болот же тескерисинче. Ошондуктан, бул ишти өзгөчө реалдуу, калыс жана кызыкдар болуп карап чыгыш керек. Максат – университеттин ишин жакшыртыш!

Андан ары Төлөбек Абдырахманов аталган комиссиянын курамына поректорлор да кошулганын белгилеп, аны негиздеп берди. Ректордун айтымында, проректорлор өздөрү тейлеген багыт боюнча маалымат топтоп, тигил же бул факультетке, институтка ректораттан кандай жардам керек экендигин аныктап, сунуштарын жазып беришет. - Ошого жараша биз иш алып барабыз. Факультеттердин, институттардын ийгилиги - жалпы университеттин ийгилиги. Ишиңерге ийгилик каалайм, - деп сөзүн жыйынтыктады ректор.

Ректордун жолугушуусунан кийин комиссия мүчөлөрү тарых жана чөлкөм таануу институту менен компьютердик технологиялар жана жасалма интеллект институтунда болушту.

* * * * *

* * * * *