Мамлекеттик тилди КУУда жайылтуу жана мамлекеттик тил аркылуу билим берүүнүн сапатын жогорулатуу максатында жыл сайын окуу жылынын аягында ѳткѳрүлүүчү мониторинг уланууда. 2023-жылдын 3-апрелинде мамлекеттик тил жана коомдук иштер боюнча проректору, мониторинг жүргүзүү боюнча комиссиянын тѳрагасы Садык Алахан баштаган комиссия тарабынан математика жана информатика, география, экология жана туризм факультеттеринин кафедраларынын ички иш кагаздары, жумушчу программалары, ОМК, протоколдору жана илимий иштер каралды. 

Жалпысынан алганда, кафедралардын иш кагаздары мамлекеттик тилде жазылып жатканы байкалды. Математика жана информатика факультетинин 2 кафедрасы иш кагаздарын, жумушчу программаларын мыкты деңгээлде даярдаганын кѳрсѳтүштү. Калган кафедраларда кошумча оңдоп, толуктай турган жумушчу программалар кемчиликтери менен кѳрсѳтүлдү. География факультетинде протоколдор, ОМКлар мамлекеттик тилде жүргүзүлүп жатканын байкоого болот, бирок жумушчу программалар бардык кафераларда 2022-2023–окуу жылына даярдалган макет менен жаңыланган эмес.

4-апрель күнү комиссия мүчөлөрү юридика факультетинде болушту. ОМК, жумушчу программалар кыргыз, орус тилинде бар. Жумушчу программалар  жаңы үлгү менен даярдалган. Протоколдор аралаш жазылган. Билдирүү, студенттер менен болгон ички иш кагаздар мамлекеттик тилде жазылып, бүтүрүүчүлѳрдүн квалификациялык иштери мамлекеттик тилде жазылып, корголуп жатканы байкалды. Юридика факультетинде да 2 кафедра иш кагаздарын жогорку деңгээлде алып барып жатканын белгилѳѳгѳ болот.

6-апрель күнү химия жана химиялык технологиялар факультети менен адистерди кайра даярдоо жана кесибин жогорулатуу институту мониторингден ѳтүштү. Химия факультетинин 3 кафедрасы комиссиянын айтылган сунуштарын кабыл алуу менен кээ бир ички иш кагаздарын толуктай турган болушту. Адистерди кайра даярдоо жана кесибин жогорулатуу институтунун иш кагаздары мамлекеттик тилде жүрүп жатканын,  ага окутуучу-профессордук курамдын жигердүү иштеп жатканы кѳрүнүп турду.

Эскерте кетсек, аталган мониторинг ректордун буйругу менен бекитилген атайын график боюнча окуу жайдын бардык түзүмдѳрүндѳ ѳткѳрүлүүдө.

Динара Мырзагулова - мамлекеттик тил секторунун башчысы