2023-жылдын 29-мартында башкы имараттагы чоң жыйындар залында Кыргыз Республикасынын эл акыны, Токтогул атындагы мамлекеттик сыйлыктын лауреаты, Кыргыз Республикасынын Толук жана Ыйгарым укуктуу элчиси Акбар Рыскуловдун 70 жашка толушуна арналган “Эл акыны жана элчи’’ деп аталган адабий-поэтикалык кече болуп өттү. Жыйынды мамлекеттик тил жана коомдук иштер боюнча проректор Садык Алахан алып барды. Кыргыз Республикасынын эмгек сиңирген артисти Алина Жетигенова Акбар Рыскуловдун сөзүнө жазылган “Насыйкат’, “Дагы бир жолук” деген ырларды аткарган соң, юбилярды ректордун атынан окуу иштери боюнча проректор Эрлан Базарбаев куттуктады.

Андан кийин Кыргыз эл акыны, юбилярдын устаты Токтосун Самудинов, КР Жогорку Кенешинин экс-төрагасы, академик Абдыганы Эркебаев, академик Осмонакун Ибраимов, Кыргыз Республикасынын эл жазуучусу Мелис Абакиров, оор атлетика боюнча дүйнөнүн жана Москва олимпиадасынын чемпиону Каныбек Осмоналиев, Кыргыз Республикасынын эл акыны Кожогелди Култегин Акбар Рыскуловдун чыгармаларынын езгөчөлүктөрү тууралуу сөз кылышып, юбилярды мааракеси менен куттукташты.

Иш-чаранын жүрүшүндө Кыргыз Республикасынын эл акыны Акбар Рыскулов өзү жазган жана которгон ырларынан окуп, катышуучулардын суроолоруна жооп берди, ал эми Кыргыз Республикасынын эмгек сиңирген артисти Токтобек Асаналиев автордун сөзүнө жазылган “Боогачың сенин болоюн!”, белгилүү ырчылар Аскат Мусабеков "Канышай”, Анарбек Сардарбеков “Кар вальсы”, “110-маршрут" деген ырларды аткарышты, о.э. Касым Тыныстанов негиздеген “Кызыл учкун” адабий ийриминин улантуучу “Жаш толкундар" адабий ийриминин катышуучулары Акбар Рыскуловдун ырларынан окуп беришти.