2022-жылдын 3-февраль күнү башкы имаратынын алдындагы аянтчада коомдук жана мамлекеттик ишмер, окумуштуу жана педагог, техника илимдеринин доктору, профессор, Улуттук илимдер академиясынын академиги, илим жана техника боюнча Кыргыз ССРинин Ленин комсомолу сыйлыгынын лауреаты, “Ардак белгиси” орденинин ээси Советбек Жайлообекович Токтомышевди акыркы сапарга узатуу зыйнаты болду. Маркумдун сөөгү аянтчанын ортосундагы секичеге орнотулган соң, КУУнун ректору Канат Садыков аза күтүү митингин ачып, коомдук жана мамлекеттик ишмер, окумуштуу-педагог, техника илимдеринин доктору, профессор, академик Советбек Жайлообекович Токтомышевдин 1-февраль күнү 79 жашында катуу ооруунун кесепетинен жарык дүйнөдөн кайтышы менен мамлекетибиздин илим жана билим берүү коомчулугу, Кыргыз улуттук университетинин жалпы жамааты чоң жоготууга учураганын белгиледи.

Андан ары ал маркумдун өмүр жолу, аткарган иштери, сиңирген эмгектери тууралуу кыскача маалымат берип, "Бүгүн биз терең ойлуу кеңешчи, таланттуу жетекчи, өзгөчө мүнөздүү инсандан айрылып, кош айтышып, акыркы сапарга узатып турган учурубуз. Кыргыз улуттук университетинин профессордук-окутуучулук курамынын атынан Советбек агайыбыздын үй-бүлөсүнө, жакын туугандарына терең көңүл айтабыз. Агабыздын арты кайрылуу болсун, кайрат кылыңыздар. Биз ыраазыбыз. "Агайыбыздын жасаган эмгеги дагы уланат" деп убада беребиз. Кош болуңуз, урматтуу агабыз Советбек Жайлообекович", - деп маркумдун үй-бүлөсүнө, жакын туугандарына көңүл айтты. Ал о.э. Билим берүү жана илим министри Болотбек Дуйшекович Купешев ооруканада дарыланып жаткандыгына байланыштуу келе албай калгандыгын, бирок Советбек Токтомышевдин жалпы туугандарына жана кесиптештерине өзүнүн атынан көңүл айткандыгын билдирди.

Андан кийин, Советбек Токтомышев тууралуу эскерүү жана коштошуу сөздөрүн Министрлер Кабинетинин Төрагасынын орун басары Эдил Байсалов, Улуттук илимдер академиясынын президенти Мурат Джуматаев, Советбек агайдын курсташы, Улуттук илимдер академиясынын мүчө-корреспонденти, КУУнун профессору Эсенбек Мамбетакунов айтышты.

Аза күтүү митингинин соңунда Советбек Токтомышевдин иниси Өмүркулов Алибек чыгып сүйлөп, бүгүнкү коштошуу зыйнатына катышып, маркумдун үй-бүлөсүнүн кайгысын тең бөлүшүп жаткан Президенттик Администрациянын, Министрлер Кабинетинин, Бишкек Мэриясынын жана Улуттук университеттин өкүлдөрүнө терең ыраазычылыгын билдирди.

Маркумдун сөөгү Ала-Арча көрүстөнүнө коюлду.