2022-жылдын 27-январь күнү эрте мененки саат 10до 8-окуу имаратындагы конференц-залда 2020-жылдын 13-ноябрында президенттин м.а. Садыр Жапаровдун №39-жарлыгы менен бекитилген "Кыргыз жараны" концепциясын ишке ашыруу максатында мамлекеттик жана муниципалдык башкаруу факультети тарабынан уюштурулган "Жарандык иденттүүлүктү өнүктүрүү саясаты жана практикасы" аттуу тренинг башталды. Жыйынга Чүй областынын мамлекеттик жана муниципалдык башкаруу органдарында иштеген кызматкерлер катышууда.

Иш чараны факультет деканы Кундуз Базакеева ачып, тренинг Маданият, маалымат, спорт жана жаштар саясаты министрлиги жана "Пис Нексус" фондунун колдоосу менен өткөрүлүп жатканын билдирди жана сөз кезегин КУУнун ректору Канат Садыковго берди. Ректор президенттин жарлыгы менен бекитилген "Кыргыз жараны" концепциясынын негизги максаты - этностор арасындагы ынтымакты бекемдөө аркылуу кыргыз коомундагы стабилдүүлүктү камсыз кылуу экенин айтып, аталган концепцияны талкуулап, элге түшүндүрүп, ишке ашырууда Билим берүү жана илим министрлигинин, Маданият, маалымат, спорт жана жаштар саясаты министрлигинин, о.э. мамлекеттик жана муниципалдык башкаруу органдарынын кызматкерлеринин ролу зор экенин белгиледи жана жыйындын катышуучуларына ийгиликтерди каалады.

Өткөрүлүп жаткан жыйындын максаты жана милдеттери, иштөө эрежелери тууралуу "Пис Нексус" фондунун өкүлү Канатбек Абдиев айтып берди.

Учурда, иш чаранын катышуучулары жарандык иденттүүлүктүн айырмалоочу белгилерин, өзгөчөлүктөрүн, аны калыптандыруу ыкмаларын, "Кыргыз жараны" концепциясынын саясий-укуктук негиздерин, максатын, башкы милдеттерин, негизги багыттары менен жоболорун талдашып, аталган концепцияны алдыга жылдыруудагы мамлекеттик жана муниципалдык органдардын ролу жана мааниси, о.э. Концепцияны ишке ашыруунун болжолдуу иш пландары менен таанышууда.

Тренингдин иши эртең, 28-январь күнү улантылат.