Журналистика факультетинин студенттери 2019-жылдын 15-20-апрель күндөрү Красноярск шаарындагы академик М.Ф.Решетнев атындагы Сибирь мамлекеттик илим жана технология университетинде (СибГУ) болуп өткөн XVII Бүткүл россиялык жарнама жана коомчулук менен байланыш фестивалынын алкагында болуп өткөн «Енисейдеги жарнама жана коомчулук менен байланыш жумалыгына» («Ярпиар-2019»)  катышып, жакшы ийгиликтер менен кайтышты.

Фестивалга Москва, Санкт-Петербург, Иркутск, Кемерово, Ижевск, Абакан, Новосибирск, Томск, Барнаул, Якутск ж.б. шаарларынан келген 19 студенттик команда менен катар Ж.Баласагын атындагы КУУнун «Жарнама жана коомчулук менен байланыш» кафедрасынын башчысы Б.Максутова менен доценти Р.Токсоналиева жетектеп, курамына аталган багытта окуган студенттер Олжобай уулу Амангелди (4-курс), Суванкулов Баяман (3-курс), Туманбеков Руслан (2-курс), Алиев Исмаил (2-курс), Рахимов Умаржан (2-курс) кирген «НацPRодукт» командасы да катышты. 

15 апрелде СибГУнун ректорунун м.а. Эдхам Акбулатов Кыргыз улуттук университетининокутуучуларын кабыл алып, ага КУУнун ректору Канат Садыковдун каты тапшырылды.

Ушул эле күнү кыргыз делегациясын социалдык инжиринг институтунун директору Светлана Пискорская жылуу тосуп алып, жолугушууда аталган факультет менен кызматташуу талкууланды.

Фестивалдын алкагында «Жарнама жана PR: инновация жана каада-салт» аталышындагы илимий-практикалык конференция, олимпиада, социалдык тармактардагы коммуникация, компаниянын ребрендинги, кейстерди жактоо жана аймактык брендинг боюнча конкурстар болуп, Россиядагы жарнама жана PR жаатындагы белгилүү адистер мастер-класс өтүштү.

«НацPRодукт» командасы аталган фестивалда төмөндөгү ийгиликтерге жетишти:

• «Жарнама жана PR: инновация жана каада-салт» илимий-практикалык конференциясында Рахимов Умаржан II даражадагы диплом менен сыйланды;
• Сибирь компаниясын кейсин чечүү боюнча команда III даражадагы диплом менен сыйланды;
• «Мерседес-Бенцтин» расмий дилери «Ориондун» кейсин чечүү боюнча команда III даражадагы диплом менен сыйланды;
• «Ярхлеб» компаниясынын кейсин чечүү боюнча команда II даражадагы диплом менен сыйланды;
• Видеопрезентация конкурсу боюнча «НацPRодукт»  командасы конкурстун жеңичүүсү катары диплом менен сыйланды.

«НацPRодукт» фестивалдын программасынын алкагындагы конкурстарга эле катышпастан, иш чаранын ачылышында жана жабылышында музыкалык номерлерди тартуулап, өз таланттарын көрсөтүштү. Мисалы, Туманбеков Руслан «Маш ботойду» комуз менен чертип берсе, Суванкулов Баяман менен Туманбеков Руслан кыргыз тилинде ыр ырдап, орусиялык студенттердин дүркүрөгөн кол чабууларына татыктуу болушту.

Красноярск шаарына болгон иш сапардын алкагында команданын жетекчилери о.э. Сибирь федералдык университетине барышып, анын Шанхай уюму жана Азия-Тынч океан аймагы менен кызматташуу борборунун директору Андрей Ужва жана эл аралык байланыштар башкармасынын сектор башчысы Михаил Лузянин менен жолугушуп, университеттин журналистика факультетинин окуу-өндүрүштүк лабораториясы менен таанышып чыгышты жана журналистика жана адабиятка киришүү кафедрасынын башчысы Кирилл Анисимов менен кызматташуу тууралуу маек курушту.

 Журфактын студенттери Россиядагы жарнама фестивалында 

Бегайым Максутова - «Жарнама жана коомчулук менен байланыш» кафедрасынын башчысы