2018-жылдын 21-февралында башкы имараттагы чоң жыйындар залында Эне тилдин бүткүл дүйнөлүк күнүнө арналган иш-чара болуп өттү. Жыйынды мамлекеттик тил боюнча проректор Садык Тиллебаев ачып, КУУнун ректору Канат Садыковго сөз узатты. Ал бүгүнкү белгиленип жаткан датанын маңызына токтолуп, иш чаранын катышуучуларын эне тил майрамы менен куттуктады.

КР Президентинин алдындагы Мамлекеттик тил боюнча улуттук комиссиянын төрагасы Назаркул Ишекеев жыйындын катышуучуларын бүгүнкү майрам менен чын ыкластан куттуктап, Эне тилдин эл аралык күнү 1999-жылдын 17-ноябрында ЮНЕСКОнун башкы конференциясында жарыяланып, 2000-жылдан баштап белгиленип келе жатканын айтты жана "Ал эмне үчүн 21-февралда белгиленет?" деген суроого жооп берди. Анткени, 1952-жылдын 21-февралында бангладештик студенттер өз эне тилин мамлекеттик тил катары кабыл алынсын деген талап менен демонстрацияга чыгышып, курман болушкан. Ошол күндү эскерүү максатында 21-февраль “Эне тилдин эл аралык күнү” деп белгиленип калган. Улуттук комиссиянын төрагасы азыркы учурдун маанилүү маселелеринин бири - жаштардын эне тилге болгон кызыгууларын арттыруу экендигин да баса белгилеп кетти.

Расмий куттуктоодан кийин Назаркул Ишекеев мамлекеттик тилди өнүктүрүүгө кошкон салымдары үчүн математика жана информатика факультетинин деканынын орун басары Рахманкулов Бахтиярга, тарых жана чөлкөм таануу факультетинин ага окутуучусу Төлөбаева Элидага жана факультеттер аралык мамлекеттил тил кафедрасынын ага окутуучусу Дүйшеналиева Светага Мамлекеттик тил боюнча улуттук комиссиянын Ардак грамоталарын тапшырды.

Иш-чаранын экинчи бөлүгү КУУда окуган ар түрдүү улуттун студенттери катышкан сынак менен улантылды. Студенттер өз эне тилинде кыскача баяндамаларды көркөм окуп, чакан музыкалык номерлерди көрсөтүштү. Мамлекеттик тил боюнча проректор башында турган калыстар тобу алардын даярдыгына калыс баасын берип, жакшы даярдык менен келгендерге сыйлыктарды тапшырды.